Pangandam batok coronavirus tukion
CEBU, Philippines — Makigtagbo si Gobernador Gwendolyn Garcia sa kadagkuan sa Mactan Cebu International Airport ingon man sa Department of Health kalabot sa gikabalak-an nga corona virus nga nikatap sa China.
Tumong niini nga masayran kung unsay gihimo sa awtoridad sa pagseguro nga dili kini moabot ug mokatap sa Sugbo.
“Yes.. I’ve been going over and over it in my mind on how the Province could act given the limitations that we have as regards of the prevention of entry,” matud ni Garcia.
Ang MCIA maoy may daku nga papel niini sumala ni Garcia sanglit moagi man sa tugpahanan ang mga mosulod sa Sugbo gikan sa ubang nasud sama sa China. Nasayud ang gobernador nga dili mahimo nga mo-ban og flights gikan sa China ilabi na nga aduna kini implikasyon sa international relations sa Sugbo mao nga gusto siya masayud gikan sa mga awtoridad.
“To see what possible stronger preventive measures we can implement,” matud ni Garcia. Apil sa pakigtagboan ni Garcia ang Provincial Health Office ug Cebu Port Authority.
Nakugang ang publiko human gikataho nga adunay 5-anyos nga lalaki gikan sa Wuhan, China nga niabot sa Sugbo sayo karong buwana nga nakitaan oy sintomas sa coronavirus.
Sa China moabot na sa 25 ang patay tungod sa bag-ong sakit nga nitakboy sa dili mominus 800 ka tawo.
Ang sample specimen sa bata gipadala na sa Australia alang sa confirmation test ug gihuwat na lang karon ang resulta. –/GMR(BANAT NEWS)
- Latest
