Mokabat sa P7 milyon kapin shabu nasakmit

CEBU, Philippines — Nasakmit  ang mokabat   sa P7.4 milyones  nga gidudahang shabu  gikan sa managkapuyo kauban sa laing upat ka mga babaye nga nadakpan sa kapolisan  sa gihimong buy bust operation diha sa Sitio Simboryo, Barangay  Tayud,  Lungsod sa Consolacion sa miaging gabii. Si  Police  Major  Vermiño  Noserale, hepe  sa Consolacion  Police  Station miila sa managkapuyo  nga  mao sila  si Joan  Sanchez, 42,  ug RJ  Jerusalem, 28 , taga Barangay  Lorega  sa  Dakbayan  sa Sugbo.

Nadakpan  usab upat nila  ka mga kauban nga pulos sab nakuhaan og pinaketeng gidudahang shabu nga sila si Jonalyn  Bantasal,  27; Jenifer Flores,  28; Betty Bertosula,  25; ug  Helen  Cuevas, 52.

Gagmay nga pakete, medium  size ug dakong pakete nga dunay sulod nga gidudahang shabu nga may gibug-atong usa ka kilo ug 40 gramos ang nasakmit gikan sa grupo.

Matud pa ni Nosarale  nga nasakmit usab nila ang P40,000  nga  buy bust money ug P6,000  nga gituohang  halin sa illegal nga drugas. Si  Major  Noserale  nga kasamtangan   karon nilang gisuta ang  gikuhaan   og shabu gikan  sa maong mga dinakpan.

Dugang sa impormasyong nahipos sa kapolisan mga bodegero ang mga nadakpan apan silay magbuot kung kinsa ang ilang hatagan nga ilang kaila na.

Ang mga dinakpan pangkasohan og kalapasan sa Sec. 5 and Sec. 11 Art. II RA 9165. /IBM (BANATNEWS)