Pagpangrehistro sa Comelec nagmingaw pa

CEBU, Philippines — Wala na mahibulong ang kadagkuan sa Commission on Elections sa Sugbo nga nagmingaw ang unang adlaw sa registration sa mga botante niadtong Lunes.

Base sa Comelec Resolution 10635, magsugod ang voters registration sa Enero 20, 2020 hangtud sa Septiyember 30, 2021 alang sa Mayo 2022 nga eleksiyon.

Matud ni Cebu Provincial Election Supervisor, Atty. Lionel Marco Castillano, nga kasagaran sa mga gagmay nga lungsod moabot ra sa 15 ang magparehistro sa unang adlaw samtang moabot sa 50 ang sa mga dagku nga lungsod ug dakbayan.

Sigun ni Cebu City Election Assistant Omar Mamalinta nga minus ang nagparehistro niadtong gumikan kay bag-o pa nahuman ang Sinulog Festival ug naglain sab ang panahon.  Niabot og 136 ang nagparehistro sa Cebu City First District ug 99 sa Cebu City South District.

“We are expecting nga ubay-ubay ang magparegister considering the fact nga duna tay more than siguro a year and a half nga mo cater ta og magpa-register, in fact we are open from Mondays to Saturdays including holidays,” matud ni Mamalinta.

Walay rehistro sa Abril 9 ug 10, 2020 alang; Disyembre 25, 2020, ug Abril 1-2 2021.

Si Attorney Marchel Sarno, election officer sa Cebu City North District, niingon nga hayan sa mosunod nga mga adlaw daghan na ang magparehistro.

Giklaro ni Sarno nga ang mga magparehistro kinahanglan gyud nga magdala og balido nga identification card. Sa Dakbayan sa Talisay niabot lang sa 79 ka tawo ang nagparehistro sa unang adlaw.

Si Joanna Oville, election assistant supervisor sa siyudad, nagkanayon nga ila gipangandaman ang unang adlaw apam mingaw.

Sa Dakbayan sa Mandaue, matud ni Comelec Officer, Atty. Anna Fleur Gujilde, nga mobutang sila og satellite voters registration cente rs sa matag barangay alang niadtong mga kawani ug tinun-an nga dili makaadto sa ilang buhatan.

Nunot niini si Gujilde niingon nga ilang pahibaw-on ang mga barangay kapitan alang itakda nga pagpangrehistro sa ilang tagsa-tagsa ka dapit. /GMR (BANATNEWS)