Saad ni Duterte singlon ni Labella
CEBU, Philippines — Seguruhon ni Cebu City Mayor Edgardo Labella nga ang saad ni Presidente Rodrigo Duterte nga tabang sa kahimtang sa trapiko dili madugay ang pagpatuman.
Giingon ni Labella nga dili lang niya pahinumduman si Duterte apan kuliton niya ang Office of the President pinaagi sa Office of the Presidential Assistant for the Visayas aron dili malimtan ang maong saad.
“Bisag ingnon ko nila nga kulit kaayo, pero ako gyud sila kuliton, traffic is a very serious problem,” matud ni Labella.
Si Atty. Jerone Castillo kinsa gitudlo nga city treasurer ni Labella mahimong point person alang sa pag-follow-up sa maong saad gikan sa Office of the President.
Si Labella niingon nga angayan si Castillo alang sa buluhaton tungod kay kaniadto siya nagtrabaho sa Department of Public Works and Highways.
Sa una niyang pagtambong sa Sinulog, nisaad si Duterte sa mga Sugbuanon nga mangita siya og pondo aron matabangan ang pagpadali sa proyekto sa riles aron masulbad ang problema sa trapiko sa Sugbo nga iyang gihulagway nga “makalilisang.”
Giingon ni Duterte nga dili na mapalapdan ang mga karsada sa Sugbo tungod kaysa sinugdanan dili na lapad ang dalan isip labing karaan nga siyudad sa nasud.
Si Labella nagkanayon nga nalipay siya tungod kay ang presidente wala lang nitambong sa Sinulog apan nisaad nga motabang sa lungsod. GMR (BANATNEWS)
- Latest
