PRO7: Way paghubas ang mga tawo

CEBU, Philippines — Gibanabanang kapin sa duha ka milyones ka tawo ang gidaghanon sa mga nitambong o naa sa Syudad sa Sugbo atol sa kasaulogan sa Sinulog kagahapong adlawa sumala pa sa pangulo sa kapolisan sa rehiyon.

Una nini, si Cebu City Police Office director Police Colonel Engelbert Soriano namahayag sa buntag nga mokabat sa 1.5 milyon ka tawo ang mga tawong naa sa Sinulog Grand Parade route. Wala pay labot sa ihap ang mga tawong atoa nagpunsisok gikan sayo sa kaadlawon hangtud pagkagabii sa Basilica Minore del Sto. Niño aron manimba.

Apa si Police Brigadier General Valeriano De Leon, direktor sa Police Regional Office (PRO-7) nagkanayon nga sa pagdagan sa oras nagkadaghan ang mga tawo nga nasuroy-suroy sa kadalanan hasta sa simbahan ug kadtong mga nanan-aw sa parada.

Silang Valeriano ug Soriano karon pa nakasuway pagdumala og ingon niini kadako nga kalihokan nga sila maoy nangulo sa pagpangandam sa seguridad.

Si De Leon nangunay sab sa pagsuroy sa mga karsada sa wa pa siya misulod sa Cebu City Sports Complex ug siya mihulagway sa mga tawo nga walay pagkaluya sa pagselebrar sa kapistahan sa Senyor Sto. Niño.

“Hindi lang ito selebrasyo para sa taga Cebu kung hindi selebrasyon ito sa lahat na Pilipino,” asoy pa niya.

Siya nagtuo nga ang gidaghanon sa tawo wa mohubas kini gumikan kay gusto gyud nga mosaksi sa tibuok nga mga kalihukan.

Si Cebu City Mayor Edgardo Labella una na sab mibanabana nga moabot og 6 milyones ang mga tawong nangabot sa siyudad kagahapon adlawa.

Nalipay sab siya nga nipahibawo nga hapsay ug malinawon kay walay mga natalang dagkong panghitabo. Giangkon sab ni De Leon nga dako og natabang sa kahapsay ang pagpawong sa signal sa mga cellphones.

Nagpasalamat sab siya sa mga Subuanon ug sa mga bisita nga nikooperar sa ilang giputaman nga seguridad atol sa kalihukan. /IBM (BANATNEWS)