Duterte nitan-aw sa Sinulog 2020

CEBU, Philippines — Padaso alas 6 na sa gabii niabot sa Cebu City Sports Complex si Presidente Rodrigo Duterte kinsa maoy pinasidunggang bisita sa gipahigayon nga Sinulog 2020 gihimo kagahapong adlawa.

Gihangop siya ni Cebu City Mayor Edgardo Labella kinsa mipadayag sa iyahang grabeng kalipay gumikan sa pagsanong ug pagbisita sa pangulo aron sa pagsaksi sa dakong selebrasyon sa Sugbo.

“Bisan unsa nimo ka busy running the affairs of the State, imong gitagaan og higayon ang pagduaw kining imong igsuon nga mga Sugbuanon. Kining gugma nga imong gipakita kanamong tanan dinhi sa Sugbo amo gayud tumbangan og gugma Mr. President. Diha kanimo ang among mga kasing-kasing puno sa kalipay ug kahinangop nga imo gyud intawon giduaw dinhi sa dakbayan sa Sugbo,” asoy pa ni Mayor Labella.

Nasaksihan una ni Presidente Duterte ang duha ka pasundayag sa Siloy sa Alcoy diin misayaw si Gob. Gwendolyn Garcia ug ang Lumad Basakanon.

Human niini, si Office of the Presidential Assistant for the Visayas Secretary Michael Dino maoy mipaila kang Presidente sa wala’y paglangay.

Atubangan sa libuan ka mga Sugbuanon kinsa dili pagsaksi sa Sinulog Grand Parade ang gihimo apan naghuwat sab sa pag-abot niya mihatag siya og mensahe nga gibana-banang milanat og 20 minutos.

Sa mensahe ni Duterte kini miasoy dako iyang kalipay nga nakighugoy-hugoy sa mga Sugbuanon sa Sinulog kay dako niyang garbo nga nahimong kabahin sa maong kasaulogan.

Gihulagway sab ni Duterte nga ang Sugbo nilambo og maayo ug ang problema nalang ang mobility kay huot ang lugar ug gagmay ang mga dalan samtang malisod ang pagpalapad sa mga buildings.

Matud ni Duterte maayong butangan commuter train isip mahimong haom nga matang sa mass transport dinhi.

Mipasalig siya nga pangitaan og paagi ug gani kini mipadayag nga andam siya mangita og pundo aron mapalambo ang transportasyon sa Sugbo. “Pangitaan nato’g paagi, parehason nato sa Manila. You can’t expand anymore. Sige mo og lalis bisan unsaon pa gamay gyud ang lugar. Because Cebu is an old city nga naabtan nalang sa bag-o,” dugang pasabot niini uban sa palabtik sa kasungian sa mga lokal nga mga opisyales bahin sa kun unsa nga mass transport system ang angay sa Sugbo.

Samtang giabibahan ang pangulo sa kadaghanan sa nanan-aw, adunay pipila nga wala mahimuot tungod kay naputol ang presentasyon.

“Wa ko malipay sa Sinulog kay mura man og wala na continuous ba ang pag-celebrate nato sa atong Sinulog dapat continuous unta na kay base ni Mr. President ang iyang giingon niari siya pag celebrate sa Sinulog dili nga niari siya tungod sa iyahang speech,” sigon pa sa usa sa mga guest nga taga Siyudad sa Naga nga naa sa VIP Section. /IBM (BANATNEWS)