Mga developer interesado sa luna sa probinsiya
CEBU, Philippines — Pipila ka developer ang interesado nga mo-develop sa mga luna nga gipang-iya sa Probinsiya sa Sugbo. Lakip na niini ang Cebu Land Masters Inc. kinsa nihatag og proposal ngadto kang Gobernador Gwendolyn Garcia kalabot sa pag-develop sa yuta sa probinsya nga anaa nahimutang sa Cebu IT Park sa Barangay Lahug, Dakbayan sa Sugbo.
Usa sa buot nga i-develop sa maong kompaniya mao ang 6,000 square meters nga parking lot sa atubangan nga bahin sa IT Park ug ang 800 square meters nga luna diha sa Salinas Drive nga gibalik sa Innoland Corporation ngadto sa Kapitolyo.
Giingong ang CLI nagplano sa pagpatukod og low cost dormitory nga adunay 420 ka units ug aduna pay parking area ug hotel.
Base sa report sa Sugbo New ang News Portal sa Probinsiya sa Sugbo buot ni Garcia nga ipaagi sa bidding ang pag-develop sa mga luna.
Sa pagkakaron ang opisyales sa Kapitolyo naggama na sa terms of reference alang sa pag-develop sa mga luna sa probinsiya. /BDB (BANATNEWS)
- Latest
