Cityhood sa Consolacion gilihok na

CEBU, Philippines — Gitinguha karon sa lungsod sa Consolacion nga mamahimo kining us aka siyudad samtang gisugdan na sa lungsod ang preparasyon sa ilang ika-100 nga katukoran karong tuiga.

Sa pakighinabi sa mga tigbalita atol sa iyang pagbisita sa buhatan sa gobernador, si Consolacion Mayor Joannes "Joyjoy" Alegado mitug-an sa mga tigbalita nga nagpatabang na sila kang Cebu 6th District Representative Emmarie "Lolypop" Oano-Dizon aron paghimo og balaudnon alang sa paghimong siyudad sa Consolacion.

Matud ni Alegado, gipahibalo siya ni Ouano nga nagpaabot nalang kini sa resulta sa 2020 census aron makompirmar nga ang Consolacion nakaabot sa rekisito nga kinahanglang nakaabot og 150 mil ang populasyon niini.

"This year 2020 will be the national census year. So the Philippine National Statistics Authority already visited me. So, they will be conducting the census this coming May. They will be tapping all our teachers," matud pang Alegado.

"She is just waiting for the final census. It will be ready by about August this year,"dugang pa niini.

Sa tinuig nga Internal Revenue Allotment (IRA) lapas na sila sa rekisito nga P100 milyones kada tuig tungod kay nakaabot na sila og P500 milyones.

Malaumon ang mayor nga mahimo na silang siyudad sa dili pa ang piniliay sa 2022.

Sa iyang bahin, si Gobernador Gwendolyn Garcia mipasalig nga andam ang probinsya paghatag og pinansyal nga tabang sa Consolacion alang sa umaabot nilang 100 founding anniversary karong Pebrero 6.

"Wa pa sila ni-request. Of course, motabang gyud ta kay that's once in a lifetime," matud pa sa gobernador kinsa misaad nga motambong gyud sa maong adlaw. Si Alegado  mipasabot sab nga mao kini ang rason kun nganong wala sila moapil sa Sinulog karong tuiga aron unta depensahan ilang korona.

"So sad kaayo ta nga wa ta ka-defend sa atoang being champion. It is because duol ra kaayo sa atong centennial celebration… I would say di na madala sa lawas," dugang sa mayor.

Apan iyang gipasalig nga bisan pa niini, walay paglubad ilang pagtahod ug pagbalaan sa Senyor Sto. Niño. /IBM (BANATNEWS)