OCD, BFP andam na sa Sinulog

CEBU, Philippines — Andam na ang Office of the Civil Defense ingon man ang Bureau of Fire Protection 7 alang sa Sinulog 2020.

Gibutyag sa tigpamaba sa OCD-7, Riza Joy Hernandez, nga gihimo kagahapon ang full activation sa ilang incident management team nga nahimutang sa One Central Hotel aron hugot nga i-monitor ang mga kalihukan sugod karong adlawa hangtud ugma.

Asoy ni Hernandez nga ang nahimutangan nila strategic location sa ilang incident management team kay duol ra kini sa Basilica Minore del Sto. Niño ingon man sa Cebu City Sports Center  diin ipahigayon ang ritual showdown sa mga contingents.

Giawhag ang katawhan nga magdala og panagang sa uwan ug init, ug magdala og extra nga t-shirt aron makailis kun panington og maayo.

Sa opisina sa OCD-7 anaa ang emergency operations center nga maoy resource provider nila ug sa City Hall duna sab sila’y representante nga ilang action officer sa Multi-Agency Coordination Center.

Samtang si Chief Inspector Noel Nelson Ababon, hepe sa Regional Operations Division sa BFP-7, niasoy nga ang gihimo nila mao ang pagpaubos sa red alert status sa ilang stations lukop Central Visayas tungod kay ang mga turista hayan motabok kini sa ubang suroyanan sa rehiyon. Gipahibawo ni Ababon nga nag-augment sila og laing unom ka fire engines gikan sa Lapu-Lapu, Mandaue, Naga, Talisay, Consolacion ug San Fernando aron idugang sa Cebu City. Gihimo kini aron ang mga substation sa Cebu City labi na kadtong naa sulod sa carousel dili nalang ma-deploy og lain aron kun dunay insidente nga mahitabo sa sulod dunay makaresponde. /GMR (BANATNEWS)