Lima sikop pagpamaligya’g tambal para sa mga buang

CEBU, Philippines — Nasikop ang lima ka tawo nga namaligya og tambal para sa buang atol sa gipahigayon nga buybust operation sa City Intelligence Branch sa Cebu City Police Office (CCPO) sa dan Juana Osmeña Barangay Kamputhaw Dakbayan sa Sugbo.

Giila ang mga dinakpan nga sila  Al-Sharief Jinulla Sulpicio, 25;  Reypie Isarat Jabulla, alyas Rey, 29; Alhabsal Dayan Bantayan alyas “EJ”, 36;  Aljes Julpi Ambabang, alyas AR; ug Al-Cimar Jinulla Sulpicio alyas  “RR”, 27,  nga pulos taga Julu, Sulu ug kasamtangang nagpuyo sa Osmeña Boulevard sa Barangay Sambag 2 sa Dakbayan sa Sugbo. Matud ni CIB chief Police Major Randy Caballes nga adunay report nga nadawat ang ilang buhatan kalabot sa pamaligya sa tabletas nga tambal para pangpakalma sa buang nga gitawag og “valium.”

Dugang pa ni Caballes gipaubos nila og surveillance ang grupo ug sa dihang nakompirmar ang report gihimo dayon ang operasyon.

Usa kini ka regulated drugs maong kinahanglang adunay reseta sa doktor nga may pagtugot gikan sa Philippine Drug Enforcement Agency ayha pa makapalit niini.

Miuso kining maong matang sa tambal niadtong dekada 90 sa dihang wala pa ma ila ang shabu.

Tungod sa mga kalihukan sa Sinulog gituohan ni Caballes nga gisuwayan kinig baligya dinhi sa siyudad.

“Para Sinulog na siya. Kana ganing mga turista gikan nag-inom, unya ganahan sila magpakalma, mopahuway, mao na siyay gamiton nila kadalasan mogamit ani mga foreigners, mga turista,” matud pa ni Caballes

Ang mga nasikop nakuhaan og mga 272 ka tambal nga valium nga adunay brand nga Diazepam, 11 ka morphine sulfate nga mobalor ang tanan sa P42,450.00. Si Police Colonel Engelbert Soriano ang officer in charge sa CCPO nagkanayon nga bisan legal ang maong matang sa tambal apan dili kini mahimong ibaligya ni bisan kinsa.

“Ang valium kasi prescription drug kasi yan.Parang kumbaga sa baril, okay ang baril kung meron kang lisensya but if you don’t have any prescription given by a licensed physician and you’re in possession of Valium, magiging prohibited drugs siya,” dugang ni Soriano.

Padayon nga naniid ang kapulisan sa dakbayan sa Sugbo sa ecstasy nga dako ang posibilidad nga mo uso kini niining panahon nga adunay kalingawan sa Sinulog. – Sheriza Mae Uy/IBM

RO-7 maoy magbuot pagpawong sa signal

Gibutyag sa Police Regional Office 7 nga sila maoy magbuot kung kanus-a pawngon ug ibalik ang signal sa tanang telecommunication companies atol sa kalihukan sa Sinulog 2020.

Matud ni PRO7 Regional Director Police Brigadier General Valeriano De Leon sila maoy dunay kontrol sa pagpalong sa signal bisan pa man aduna nay gipagawas nga mando ang National Telecommunications Commission bahin niini.

Kahinumduman nga una nang migawas ang  balita labot sa pagtugot na sa NTC labot sa signal shutdown ug nabutang usab unsa nga mga oras nga wala nay signal.

Giklaro ni De Leon nga dili pa final ang schedule nga gihatag sa NTC sa pag palong sa signal. Dugang pa ni De Leon nga mamahimong dili masunod ang oras nga gibutyag sa NTC kay mag-agad kini sa assessment sa intelligence community.

“We can recall we can modify kaya duon sa meeting namin that is the initial request that is the draft. We can modify our request. Kaya lang sabi ko there should only be one channel to say it so that not everyone will say go and the other will say no go,” dugang pasabot ni De Leon

Hinuon atol sa mga dagkong kalihukan sa fluvial, solemn procession ug ang grand parade pawongon gyud ang signal sa maong mga oras tungod kay mao kini ang mga panahon nga magdasok ang daghang mga tawo. /IBM (BANATNEWS)