Ban sa pork products sa Sugbo padayon

CEBU, Philippines – Nagpabilin ang ban sa Sugbo sa tanang pork products gikan sa Luzon.

Kini human nasayran nga adunay pipila ka kompanya nga nagtinguha nga mapasulod ang ilang produkto sa baboy alang sa Fiesta Senyor ug sa Sinulog 2020.

Si Dr. Mary Rose Vincoy, ang provincial veterinarian, ug vice chairman sa Anti-African Swine Fever Task Force (ASF) sa Probinsiya sa Sugbo, nitug-an nga nakadawat sila og tip kalabot niini.

Matud ni Vincoy nga dunay sulat ang San Miguel Foods ngadto sa Sinulog Foundation, Inc. bahin sa sponsorship nga P3 milyones ug laing P250 mil nga mga produkto sa Purefoods Homed Products sama sa Tender juicy, Purefoods tocino, Purefoods Nuggets ug Star Corned Beef ug San Miguel Beer.

Si Gob. Gwendolyn Garcia nagkanayon nga dili kini mahimo sanglit kalapasan kini sa executive orders nga iyang giluwatan batok sa ASF.

Laing sulat usab ang nadawat sa Kapitolyo gikan ni Felix Tiukinhoy Jr, ang presidente sa Philippine Association of the Meat Processors, Inc., ngadto sa SFI labot sa maong sponsorship package sa San Miguel Purefoods alang sa Sinulgo Festival.

Si Garcia nagkanayon nga suportado sa Probinsiya sa Sugbo ang kalihukan sa Sinulog ilabi na ang mga gusto mo-sponsor alang sa kalampusan niini.

“But in the same manner, should we all be united to protect Cebu from ASF,” matud ni Garcia.

Si Vincoy nagkanayon nga human sa ilang pagkadawat sa maong mga suwat, heightened alert na dayon ang task force uban sa mga local counterparts ilabi na sa Dakbayan sa Sugbo, Talisay ug Mandaue aron maseguro nga walay mapasulod nga pork products nga mabaligya atol sa kalihukan sa Sinulog nga posibleng maoy makarisgo sa hog industry sa tibuok probinsiya. /GMR (BANAT NEWS)