Magtiayong seniors gipatay

CEBU, Philippines – Patay ang magtiayon human sila gipamusil sulod sa ilang panimalay ug swerte nga nakalingkawas ang tulo nila ka mga apo niini Huwebes gabii diha sa bukiron nga bahin sa Barangay Bae, Lungsod sa Sibonga.

Ang nakalas mao sila si Porferio Tolomia, 74,  ug ang kapikas niini nga si Anatalia Tolomia, 72.. Samtang nakalingkawas ang ilang tulo ka mga apo nga nagpangidaron og 19, 12 ug 11-anyos.

Matud pa ni Police Master Sergeant Bernard Otida, Desk Officer sa Sibonga Police Station alas-4 na sa buntag sila nakahibalo bahin sa maong hitabo apan sa ilang pagsusi alas-12 pa sa tungang gabii nahitabo ang maong krimen.

Sumala pa ni Otida, base sa nakuhang impormasyon nangatulog ang mga biktima sa dihang gisaka ilang balay og wala mailhing mamumuno ug pagkahuman gipaulanan sila og bala.

Ang mga biktima nakaangkon og daghang mga samad pinusilan sa ilang kalawasan nga maoy naingnan sa ilang hinanali nga kamatayon .

Samtang ang ilang mga apo swerteng nakamata ug daling nangambak sa bintana ug nidangop sa mga balay sa ilang mga kabanay.

Ang mga bata anaa karon sa buhatan sa Department of Social Welfare and Development human aron ipaubos sa stress debriefing.

Ang patay nga lawas sa mga tigulang anaa na kini karon sa punerarya aron ipa autopsy. Nakuha sa kapolisan sa crime scene ang 11 ka mga basiyo sa bala gikan wala pa matino nga armas.

Sa pagkakaron, wala pay nakitang motibo ang kapolisan sa pagpatay sa duha. Apan gibutyag ni Otida niadtong nilabay nga buwan sa Disyembre gipatay ang anak sa magtiayon nga si Hipolito diha sa ilang panimalay.

Apan ang inahan nga si Anatalia wala mopasaka og kaso tungod kay nagtuo kini nga naghikog ra iyang anak kay gibiyaan sa asawa.

Wala gisalikway karon sa kapulisan ang personal nga bangi nga usa sa mga motibo sa pagpusil patay sa managtiayon. /IBM (BANAT NEWS)