May papremyo para sa manan-aw sa Fireworks Musical Competition
CEBU, Philippines – Gipahibalo ni Cebu City Konsehal Jerry Guardo nga adunay kompetisyon alang sa mga manan-aw sa Fireworks Musical Competition nga ipahigayon didto sa South Road Properties karong gabii, Enero 17, 2020.
Kinahanglan rang buhaton sa mga manan-aw mao ang pagkuha og live video sa kompetisyon ug i-post kini sa Facebook.
Adunay duha ka mga kategoriya nga mahimong apilan. Kadtong adunay labing taas nga likes, shares, ug views sa ilang personal nga account sa Facebook makadawat usa ka cash price nga nagkantidad og P20, 000, P10, 000, ug P5, 000 alang sa una, ikaduha, ug ikatulo nga pwesto.
Samtang, kadtong adunay labing taas nga likes, shares, ug views sa ilang Facebook page makadawat og cash price nga nagkantidad og P10, 000, P5,000, ug P3, 000 alang sa una, ikaduha, ug ikatulo nga pwesto.
Karong adlawa ang opisyal nga paglansad sa labing bag-o nga dugang nga kalihokan alang sa Sinulog nga gitawag og “Sinulog sa SRP.” Duha ka mga panghitabo ang himuon nga kabahin sa Sinulog ang buhaton diha sa Il Corso Filinvest Lifestyle sa SRP- ang “Balik Baroto Regatta” sa buntag ug ang Fireworks Musical Competition sa gabii. /IBM (BANAT NEWS)
- Latest