Signal shutdown sa sabado ug Domingo

CEBU, Philippines – Alang sa seguridad sa tanan, ang National Telecommunication Commission mimando sa pagpawong sa signal sa mga cellphones karong adlaw nga Sabado ug Domingo atol sa mga dagkong kalihokan sa kapistahan sa Senyor Sto. Niño dinhi sa Metro Cebu.

Ang NTC-7 mimando sa Smart Telecommunications ug Globe Telecommunications pagpawong sa ilang signal sa Cebu City, Mandaue City ug sa Lapu-Lapu City.     

Kini mahitabo karong Enero 18,2020  sa alas-4 sa kaadlawon hangtud alas-10 sa buntag atol sa pagpahigayon sa Fluvial Procession. Ug pagka alas 12 sa udto hangtud sa alas 8 sa gabii atol sab sa Solemn Procession.

Ang apektado niini ang tulo ka nahisgutang siyudad ilabi na ang uptown ug downtown Cebu City.

Samtang sa pagka adlaw nga Domingo Enero 19, 2020 pagngon ang signal alas-3 sa kaadlawon hangtud alas 7 sa gabii gikan sa preparasyon hangtud sa pagtapos sa Sinulog Grand Parade.

Hinuon wala ibutyag kun atol sa Sinulog Grand Parade mabalik ba ang signal sa Mandaue ug Lapu-Lapu City.

Una nang namahayag ang kapolisan nga posibleng dili pagngon ang signal sa mga telcos apan himuon nila kini kun motan-aw sa selebrasyon si Pres. Rodrigo Duterte. (BANAT NEWS)