Dugang pwersa sa CCPO nangabot na

CEBU, Philippines – Nangabot na ang dugang pwersa sa Cebu City Police Office (CCPO) nga motabang alang sa seguridad sa duha ka adlaw nga dagkung kalihukan sa Sinulog 2020.

Kini maoy gibutyag ni CCPO Director, Police Colonel Engelbert Soriano, human sa pag-abot sa dugang 2,000 ka police personnel gikan sa Regional Training Center (RTC) nga kasamtangang nag-schooling. Dugang pa ni Soriano nga ang maong mga polis nga gi-deploy ibutang kini sa kadalanan nga maoy mo-cordon sa prosesyon ug sa Sinulog grand parade.

Ang dugang pwersa sa personnel subay usab kini sa giingon nga pagtambong ni Presidente Rodrigo Duterte sa Sinulog 2020 ug hangyo sa Basilica Minore del Santo Niño diin minilyon nga deboto sa Balaang Bata ang gikatakdang mangabot gikan sa nagkalain-laing dapit sa nasud.

Adunay kapin 300 ka polis nga standby ang gipakatap palibot sa Basilica ug kapin usa ka libo sa route security alang sa 6.4 kilometros nga solemn procession sa Sabado ug sa Sinulog grand parade sa Domingo. Ang ubang dapit sama sa Fuente Osmeña Circle ug Cebu City Sports Center ang gibutangan sab og mga polis diin sa kinatibuk-an mokabat sa 6,000 ka polis ang ipakatap sa Sinulog.

Gawas sa mga polis aduna usab mga motorsiklo nga maoy motabang sa closed security ngadto sa mga karo sa Birhen sa Guadalupe ug Señor Santo Niño.

Giingong anaa na sa “105 porsyento” nga andam ang CCPO sa seguridad sa Sinulog 2020.

Hinoon ang kapolisan wala pay natala nga mga Sinulog-related incidents gikan sa pagsugod sa nobenaryo sa kapistahan sa Balaang Bata hangtud sa pagsuwat niining balita. Kini ang gitug-an ni Police Lieutenant Colonel Clark Arriola, ang tigpamaba sa CCPO. Matud ni Arriola nga gikan sa pagsugod sa nobenaryo niadtong niaging semana hangtud karon wala pa gyud silay natala bisan usa ka insidente may kalabutan sa kapistahan. Sumala pa ni Arriola nga dili tungod sa daghang polis nga gipakatap ang hinungdan nga walay mga insidente nga nahitabo kung dili tungod usab kini sa kooperasyon sa katawhan.

Dugang pa ni Arriola nga gawas sa mga polis nga makita sa katawhan aduna usab silay mga gipakatap nga mga magsibilyan lang nga anaa sa kadalanan.

Si Arriola nidugang nga syento porsyento na usab silang andam sa ilang mga security plans subay sa ilang mga nasabutan kauban ang nagkadaiyang law enforcement agencies aron mopatuman sa mas hapsay ug luwas nga pagsaulog sa kapistahan ni Señor Santo Niño. /GMR (BANAT NEWS)