Bag-ong klase sa drugas gi-monitor; Upat sikop sa buy bust
CEBU, Philippines – Mas gihigpitan pa sa Cebu City Police Office (CCPO) ang monitoring sa bag-o nga klase nga ilegal nga drugas nga gipahibalo sa Philippine Drugs Enforcement Agency (PDEA7). Matud sa direktor sa CCPO Police Colonel Engelbert Soriano nga nisaka ang gidaghanon sa drugas nga nasakmit sa Dakbayan sa Sugbo samtang nagsingabot ang kasaulogan sa Sinulog 2020.
Gani, ang mga ilegalista nigamit og mga batan-on o menor de edad nga himuong runner sa ilegal nga drugas.
Sayo pa, usa ka 15-anyos nga bayongbayong ang na-rescue sa Pardo Police Station ug nasakmitan kini og shabu nga nibalor tanan ngadto sa P1.8 milyon.
Si Soriano nimando sa tanang station commanders nga subling i-monitor ang ilegal nga drugas diha sa ilang mga area of responsibility ilabi na sa mga dapit nga adunay ipahigayon nga mga party.
Ang kapolisan kasamtangang nag-monitor sa bag-ong klase nga drugas nga “crystal ecstasy” nga usa ka matang sa drugas nga makamatay.
Sa laing bahin, nadakpan sa managkalahing buy bust operation sa kapolisan sa Presinto 5 ug City Intelligence Branch (CIB) sa Lapu-Lapu City Police Office (LLCPO) ang upat ka pusher ug nasakmit gikan kanila ang 4.6 gramos nga shabu. Atol sa buy bust operation diha sa Barangay Buaya sa maong dakbayan nasikop si Wilyn Abalan Cuizon, 33, Nicole Cubico Mañago, 18 kinsa ang maong mga suspetsado nasakmitan og 21 ka gagmay’ng paketeng shabu nga nikantidad tanan sa P19,720.
Laing nadakpan mao si James Anton Ochea , 29, taga Proper Basak, Lungsod sa Compostela ug Nixon Paquibot Amistad, 41, taga Barangay Maribago, Dakbayan sa Lapu-Lapu diin ang duha nasakmitan og 1.7 gramo nga shabu nga nagkantidad tanan sa P11,560. /BDB (BANAT NEWS)
- Latest