Mobile Legend konsepto sa LLC contingent

CEBU, Philippines – Human sa unom ka tuig, mobalik og apil ang Dakbayan sa Lapu-Lapu sa Sinulog Grand Parade karong tuiga. Ang mobile game nga Mobile Legend maoy konsepto sa Lapu-lapu City contingent diin dominante ang color blue ug red sa ilang costume.

Matud ni Ken Saputalo ug Zha zha Sayih nga ang mga dance masters sa maong contingent moabot sa 96 ka dancers kinsa kasagaran mga tinun-an sa elementarya, 50 ka musicians ug anaa sa 200 ka propsmen.

Matud ni Saputalo nga nahimo nilang hagit atol sa ilang praktis ang pagpuli-puli og dancers tungod kay ang uban moundang unya naay bag-o nga kinahanglan praktisan og sugod sa routine.

Ang Lapu-Lapu City contingent mosayaw ubos sa free interpretation category.

Samtang mapasigarbuhon gihapon si Talisay City Mayor Gerald Anthony “Samsam” Gullas Jr. nga nisalmot sa Sinulog sa Lalawigan niadtong Sabado.

Kini bisan pa man og anaa lang kini sa ikaduha nga mananaug sa ritual showdown.

Si Gullas nagkanayon nga nisalmot sila sa kalihukan gumikan sa ilang pagtuo sa milagrosong bata nga si Señor Santo Niño diin ang sayaw ila gihalad alang sa kapistahan. Hinoon ang mayor nipasabot nga ang pagkahimo nga mananaug mao ang ikaduha nalang nga butang nga ilang gihuna-huna.

“Halad ra gyud ning atoa. Kung makadaug man gani bonus nalang gyud ni,” nagkanayon si Gullas.

Iya gisalig sa ilang tourism officer ang performance unya sa kabataan alang sa Sinulog Grand Parade. /GMR (BANAT NEWS)