OCD-7 nangandam sab sa Sinulog
CEBU, Philippines – Nangandam sab ang Office of the Civil Defense 7 sa umaabot nga Sinulog 2020 nga mao sab ang kapistahan sa Balaang Bata, Senyor Santo Niño.
Matud sa information officer sa OCD-7, Joy Hernandez, nga ang ilang buhatan dunay partisipasyon sa Multi-Agency Coordination Center diin duna sila’y action officer nga maoy motan-aw sa Sub-Task Group Emergency Preparedness and Response.
Kun dunay mahitabo sama sa medical emergency, dunay deployment sa mga ambulansiya pinaagi sab sa pagpakig-alayon sa Department of Health, Cebu City Disaster Risk Reduction and Management Office ug ubang volunteers sama sa Emergency Rescue Unit Fundation, Philippine Red Cross ug uban pa.
Sa petsa 17 hangtud 19 niining buwana, duna sila’y gitawag nga incident management team nga magpahimutang sa One Central Hotel aron mag-monitor sa kinatibuk-an nga kalihukan.
Dunay activation sa ilang incident command system nga gilangkuban sa command ug general staff nga maoy mag-preposition unya sa tulo ka adlaw nga heightened alert.
Si Hernandez niasoy nga sa mga kalihukan sa Sinulog 2020 tinguha gyud nila nga malikayan ang stampede ug aron sab nga dili ma-dehydrate magdala og tubig kanunay aron kun uhawon dunay mainom.
Magdala sab og panagang sa init ingon man sa uwan ug magsul-ob og light colors nga mga senina aron komportable.
Gihangyo sab nila ang mga deboto nga magpailob lang ilabi na kun mosimba sa Basilica Minore del Sto. Niño tungod kay daghan gyud og tawo ug magmabinantayon gyud kanunay tungod sa posibilidad sa binuang,” dugang ni Hernandez. /GMR (BANAT NEWS)
- Latest
