15-anyos gihimong drug courier nakuhaan og P1.9 milyones shabu
CEBU, Philippines – Grade 8 nga estudyante nadakpan sa buybust operation sa Drug Enforcement Unit sa Pardo Police Station ug nakuhaan og P1.9 milyones nga gidudahang shabu Lunes sa kaadlawon diha sa Sitio Sario, Barangay Bulacao sa Dakbayan sa Sugbo.
Ang operasyon pinangulohan sa ilang hepe nga si Police Major John Kareen Escober maoy nakadakop sa 15-anyos nga lalaki nga taga B. Aranas Extension, Barangay Duljo-Fatima ning dakbayan.
Matud pang Escober, sa posesyon sa 15-anyos nila nakuha ang kapin 286 gramos nga gidudahang shabu. Ang maong batan-on giingong regional level High Value Target sukad nga ilang nadawat ang impormasyong gihimo kining drug courier sa mga bigtime drug pushers.
Ang maong bata gikatahong miangkon nga ang nagsugo kaniya mao ang iyang bayaw aron ihatud ang drugas sa nipalit, apan wala siya magdahom nga polis diay kadto.
Ang batan-on pasakaan og kasong kalapasan sa Republic Act 9165 Comprehensive Dangerous Drug Act of 2002 ug anha ibutang sa Operation Second Chance.
Samtang duha ka mga lalaki sab ang nadakpan sa buy bust operation diha sa Don Pedro Cui, Barangay San Antonio, nga gikasikop ni Benjie Dacuba, alyas Pare, 22, taga Sitio Kalihon, Barangay Labangon.
Ang Station Drug Enforcement Unit sa Parian Police Station nakakuha og pinutos nga gidudahang shabu gikan sa suspek.
Sunod nga nasikop diha Sitio Gala, Barangay Day-as si Sandy Ejares, 39, taga Sitio Bugnay, Barangay Labangon nga nasakmitan og walo ka gramong gidudahang shabu. /IBM (BANAT NEWS)
- Latest
