Labella miawhag pangusgan ang Fire Prevention campaign sa BFP
CEBU, Philippines – Hingpit nang nakadeklarar og state of calamity ang Barangay Luz sa Dakbayan sa Sugbo human sa pag-ulbo sa sunog sa may Sitio Sto. Niño 3, San Vicente ug Nangka niadtong gabii sa adlaw nga Lunes.
Sa talaan sa Barangay adunay 88 ka mga pamilya ang nawad-an og pinuy-anan huma naugdaw ang 45 ka mga panimalay.
Matud pa ni Dave Arañez, Barangay Secretary, anaa sa Sitio Abellana Sports Complex gipahimutang ang mga nasunogan karon.
Gipahibalo sab ni Arañez nga ang yutang gitarokan sa mga balay nga nasunog nasakop kini sa kontrobersiyal nga 93-1 Lot nga iya sa lalawigan sa Sugbu.
Base sa pasiunang impormasyong nakaylap sa kabomberohan, nagsugod ang sunog sa panimalay sa usa ka Mary Ann Lapiz.
Gibana-bana nga mokabat P1 milyon ang danyos sa maong sunog, hinuon walay naangol o nakalas sa maong sunog.
Si Cebu City Mayor Edgardo Labella mipasalig nga dunay pundo ang dakbayan aron matabangan sa dinaliang panginahanglan ang mga nasunogan.
Ang dakbayan mohatag og tag P20,000 sa mga tag-iya sa balay nga naugdaw ug tag P10,000 alang sa mga renters o bed spacers. Samtang ang National Housing Authority nipasalig nga mohatag og tag P30,000 sa mga pamilyang nasunogan.
Tungod kay ikatulo na kini nga dagkong sunog ning bulana dinhi sa dakbayan, gimandoan niya ang Bureau of Fire Protection- Regional Office-7 nga palapdan pa ang pagedukar sa publiko aron paglikay sa sunog.
“I have already directed Major Abella to institute measures for fire prevention, especially it’s already January, and March is coming, which is the fire prevention month. We have to make some preventive, precautionary measures like educating our people,” ingon ni Labella.
Gipasabot ni Labella nga adunay mga taho nga sa 60-70 porsiyento sa mga hinungdan sa mga bag-ong nahitabong sunog sa dakbayan tungod sa nabiyaang nakasaksak nga powerbanks o appliances.
Si Jeffrey Ibones, pangulo sa Department of Social Welfare Service mipahibalo nga nanghatag na sila og mga tents, pagkaon ug tubig sa mga nasunogan. /IBM (BANAT NEWS)
- Latest