Polis nangangkong self-defense ang iyang gibuhat

CEBU, Philippines — Kasong homicide ang gipasaka batok sa polis nga nakapusil patay sa managsuong silingan nga gipasanginlan niining namato sa ilang panimalay didto sa Sta. Rita Village, Barangay Dumlog, Dakbayan sa Talisay niadtong Sabado sa gabii.

Si Police Major Gerard Ace Pelare, pangulo sa Talisay City Police Station miingon nga two counts of homicide ang ilang gipasaka batok ni Police Staff Sergeant Sidney Alisoso nga nadestino sa Regional Drug Enforcement Unit (RDEU).

Ang napatay ni Alisoso mao ang magsuong sila si Jelvis Cabrera, 30, ug si Joel Cabrera, 35.

Sa nahaunang pamahayag sa kapulisan, nitawag diha sa ilang buhatan si Alisoso aron mangayo og tabang human ang duha nga nibato sa ilang pinuy-anan.

Matud pa samtang nagpaabot sa mga polis gikan sa Talisay, giingong gipakigestoryahan ni Alisoso ang duha bahin sa ilang gibuhat apan gikatahong nibunot sa sundang si Jelvis ug gitigbas ang maong polis.

Si Alisoso nakasagang gamit ang iyang walang bukton hinungdan sa pagkasamad niini. Dihadiha nibunot ang polis sa iyang service firearm ug gipusil si Jelvis.

Ang igsuon ni Jelvis nga si Joel pagkakita sa igsuon nga napusilan gialegar nga miibot sab og armas ug gipusil si Alisoso apan nakaligid ang naulahi ug nakabawos sa pagpusil.

Nagkanayon si Pelare nga base sa pamahayag sa polis self- defense ang nahitabo apan aron patas , adto nalang pamatud-an sa korte ni Alisoso iyang depensa.

Gikaingon nga taud-taod na nga nagkabangi ang pamilyang Alisoso ug sa mga Cabrera gumikan sa ilang negusyo nga litsonan. Sa pikas bahin, paimbestigahan ni PRO7 Director Police Brigadier General Valeriano De Leon ang nahitabo kang Police Staff Sergeant Sidney Alisoso nga nakapatay sa managsuon.

Sumala pang De Leon kun basehan ang alegasyon ni Alisoso matawag nga self-defense ang gibuhat niini kay gitabangan kini sa managsuon ug gani nasamdan gyud kini sa pagpanigbas.

Matud pa ni De Leon ang Regional Internal Affairs Services (RIAS) na mao ang mohimo og imbestigasyong administratiba batok ni Alisoso.

Tungod sa nahitabo, girelibohan una kini sa iyang pwesto tungod nagpadayon pa ang imbestigasyon sa iyang kaso.  Si Alisoso nadestino karon sa Regional Personnel Holding and Accounting Unit (RPHAU) diin sagad ibutang ang mga polis nga nagatubang og mga kaso. /IBM (BANATNEWS)