Brgy. Officials, tanod sa Talisay makaisyu na’g citation tickets
CEBU, Philippines — Mga barangay officials ug mga tanod sa Dakbayan sa Talisay gihatagan og ngipon sa lokal nilang kagamhanan aron mapitol ang mga badlungong motorista pinaagi sa paghatag kanila og otoridad nga maka-isyu og citation tickets sa mga mga malapason sa balaod sa trapiko sa siyudad isip deputized agents.
Ang City of Talisay-Traffic Operation Development Authority (CT-TODA) ning bag-o niisyu og mga IDs, mission orders ug citation tickets ngadto sa mga barangay tanod ug opisyales sa barangay.
Ang gipang-deputized napaubos sa seminar and trainings kabahin sa traffic laws ug road safety pipila ka adlaw ang nakalabay.
Una niini, si Jonathan Tumulak, hepe sa CT-TODA sa siyudad nirekomendar nga kinahanglang magamit ang mga barangay officials ug mga tanod aron tabangan ang limitado nilang mga traffic enforcers pagmentinar sa kahapsay sa trapiko sa siyudad.
Buot ni Tumulak nga ang mga tanod mahatagan og ngipon pagpitol sa mga badlungong drayber diha sa ilang tagsa ka barangay.
Si Tumulak nagkanayon nga dugang kini sa ilang pwersa ang mga tanod nga magpabadlong o masupakon sa lagda sa trapiko.
Gisaksihan ang pagdawat sa citation tickets ug deputation orders sa mga opisyales sa dakbayan pinangulohan ni Mayor Gerald Anthony “Samsam” Gullas Jr. /IBM (BANATNEWS)
- Latest
