Managsuon namato, patay sa polis

CEBU, Philippines — Patay ang managsuon human sila nangapusilan sa silingan nga polis diha sa Sta. Rita Village, Barangay Dumlog, Dakbayan sa Talisay niadtong Sabado sa alas 10:30 sa gabii.

Ang mga namatay mao sila si Joel Cabrera, 35 anyos ug si Jelvis Cabrera, 30 anyos. Samtang ang nakapusil mao si Police Staff Sergeant Sidney Alisoso nga nagpuyo sa maong dapit ug nadestino sa Regional Drug Enforcement Unit (RDEU) sa Police Regional Office-7.

Matud pa ni Police Lieutenant Ralph Celosia, deputy chief sa Talisay City Police Station nanawag kanila si Alisoso diha sa ilang estasyon aron magpatabang tungod kay gibato ang ilang pinuy-anan sa duha ka mga lalaki.

Apan samtang nagpadulong pa didto ang mga mirespondeng polis nahitabo na ang komosyon tali kang Alisoso ug sa maong mga lalaki nga mao ang managsuong Cabrera nga silingan niini.

Sumala pang Celosia nga nisuway sa pakigestorya si Alisoso sa duha kun nganong ilang gibato ilang pinuy-anan. Apan giingong niibot og sundang si Jelvis nihulbot ug gitigbas niini si Alisoso, sumala pang Celosia base sa alegasyon sa maong polis.

Nakasagang si Alisoso apan nasamdan kini sa iyang wala nga bukton. Tungod niini, niatras ug niibot sa iyang service firearm si Alisoso dayong pusil kang Jelvis aron panalipdan iyang kaugalingon.

Ang igsuon ni Jelvis nga si Joel gikatahong niibot sab og armas ug gipabuthan si Alisoso apan wala makaigo hinungdan nga nibawos ang nauwahi ug nahagba sab si Joel.

Sumala pa sa alegasyon, nakainom ang duha ka managsuon sa dihang nahitabo ang lamok-lamok.

Nakuha sa diha sa crime scene ang usa ka kalibre .45 nga pistola nga adunay upat ka bala ug 12 pulgada nga sundang gikan sa mga namatay.

Matud pa ni Celosia nga niadtong buwan sa Disyembre gibato sab sa duha ang balay ni Alisoso.

Hinuon si Alisoso boluntaryo nga nitahan sa iyang kaugalingon sa kapulisan ug mi turnover sa iyang .9mm nga service firearm. Padayon nga nangita og testigos sa maong panghitabo ang kapulisan.

Si Alisoso gikustodiya na sa kapulisan sa Dakbayan sa Talisay samtang nagpaabot kini nga pasakaan og kaso. Wala pay mahatag nga impormasyon ang mga imbestigador kun unsay motibo sa duha nga gibato nila ang panimalay sa maong polis. /IBM (BANATNEWS)