Gipanitan ang nawong nailhan na

CEBU, Philippines — Nailhan na sa  kapolisan  ang usa ka lalaki  nga gipatay ug gipanitan ang nawong ug gilabay diha sa kasagbotan sa Barangay Fuente, Lungsod sa Carmen ug nadiskobrehan sa usa ka mag-uuma niadtong Biyernes sa buntag.

Si Police Major Roger Quijano, hepe sa  Carmen Police Station niila  sa biktima nga  si Edgardo Marco Corbo, 34-anyos, taga Sitio  Upper,  Barangay  Labogon sa Dakbayan sa  Mandaue.

Matud ni Quijano  nga ang igsuon  nga lalaki  sa biktima nga si  Roberto, Corbo, 40 kinsa nibisita sa ilang buhatan niadtong Sabado sa gabii ang niila kang Edgardo nga iyang manghud.

Ang  uwat  sa buko-buko  sa patay’ng  lawas sa biktima maoy nahimong ilhanan ni Roberto ug nibutyag kini nga ang iyang manghod nabiktima usab  kini sa pagpanunggab  pipila na katuig ang nakalabay.

Si Quijano nagkanayon nga aduna na sila’y duha ka suspetsado sa pagpatay kang Edgardo apan gipugngan pa nila ang pagbutyag sa mga pangalan niini.

Gikataho nga ang biktima gitabangan kini sa pagsagpa sa managsuong drug addict nga residente diha sa lugar.

Giingong ang maong managsuong adik nasuko kini sa pagsige og balikbalik sa biktima diha sa ilang lugar ug nagtuo nga nagpabuangbuang lang kini apan naniid sa ilang ilegal nga kalihokan. /BDB (BANATNEWS)