Libreng sakay padung sa South Road Properties

CEBU, Philippines — Adunay libreng sakay sa mga molupyo sa Dakbayan sa Mandaue, Dakbayan sa Lapu-Lapu, ug Lungsod sa Cordova ingon man sa ubang bahin sa amihanan nga mosaksi sa Sky Firework Display and Musical Competition sa South Road Properties sa Dakbayan sa Sugbo karong Biyernes.

Si Konsehal Jerry Guardo sa Dakbayan sa Sugbo ug chairman sa maong indigay, nibutyag nga ang mga bus nga mopasakay anha magpaabot sa Robinsons Mall ug SM City Cebu alang sa mga moadto sa SRP.

Gitataw niya nga kadtong nagtinguha og maayong pagkapahimutang nga naglakip sa pagbaton og lingkuranan adunay ticket nga mapalit sa kantidad nga P200 gawas nga maayo ang pagkahimutang duol usab ang maong lugar sa pagpaminaw sa pagpatukar sa live band nga ipahimutang sa may IL Corso sa SRP.

Dugang pa ni Guardo nga libre hinoon sa pagsaksi ug pagsuroy-suroy sa gawas nga bahin sa IL Corso ingon ang pagkuha og mga hulagway o pag-video sa maong indigay.

Si Guardo niingon nga ang maong indigay sa firework display sa SRP ang apilan sa tulo ka grupo gikan sa Visayas , Luzon ug Mindanao nga molat-ang og 30 minutos sulod sa tulo ka hugna.

Ang katapusan nga fireworks display nga walay labot sa indigay mao ang firework display showdown nga sa unang higayon usab masaksihan ang pagpanglupad sa maanindot nga kahayag nga pagahimoon sa showdown sa Dragon Firework.

Nunot niini ilang giandam ang tulo ka barge nga nahimutang sa kadagatan sa SRP diin adto usab ipahimutang ang mga pyrotechnics alang sa pagduslit ug pagpalupad sa pagmugna og maanindot nga kahayag sa kawanangan sa maong lugar.

Magsugod ang kalihukan alas 4 sa hapon karong Biyernes samtang ang indigay sa firework display alas 8:30 sa gabii. Buntag sa maong adlaw mao usab ang pagsaksi sa katawhan sa 1st Sinulog Regatta isip kabahin sa kalihukan sa Sinulog sa SRP 2020 nga lumba sa baroto, bugsay ug layag.

Si Guardo nipahibawo nga ang mahimong kampiyon sa maong indigay karong tuiga ang makadawat og P20,000 alang sa unang ganti, P10,000 sa ikaduha ug P5,000 alang ikatulong ganti.

Dugang pasiugdahan ang indigay sa mga maanindot nga hulagway sa mga photographers diin ang labing daghan nga anggulo sa makuha nga mga hulagway nga modaug makadawat og P10,000 alang sa unang ganti , P5,000 sa ikaduha ug P3,000 sa ikatulo. /GMR (BANATNEWS)