Shabu nasakmit sa Bohol sunogon
CEBU, Philippines — Gikatakdang sunogon sa mosunod nga buwan ang mga nasakmit nga ilegal ng drugas sa Probinsiya sa Bohol.
Matud ni Philippine Drug Enforcement Agency 7 Regional Director Wardley Getalla nga nag-consolidate pa sila sa mga nasakmit nga ilegal nga drugas sa Bohol aron ila kining ipaubos sa destruction.
Dugang ni Getalla nga sa pagkakaron aduna pa silay upat ka kilos nga ilegal na drugas ug posibleng mosaka pa kini kay padayon man ang inventory sa mga korte.
Sa naiging buwan gisunog na ang ilegal nga drugas sa Sugbo sa usa ka pabrika sa semento Dakbayan sa Naga nga gitambongan sa kadagkuan sa PDEA, kapolisan ug ni Gob. Gwendolyn Garcia.
Samtang nasakmit gikan sa usa ka babaye ug lalaki ang mokabat sa P500,000 nga shabu dihang nadakpan sa buy-bust operation sa kapolisan sa Guinacot, Dakbayan sa Danao niadtong Huwebes sa gabii.
Si Police Master Sergeant Arnold Labine niila sa dinakpan nga si Rochele Pinay, 36, ulitawo ug Jenifer Duazo, 26, pulos giila nga high-value target nga pusher sa nahisgutang dapit.
Samtang ang kapolisan sa Presinto 4 sa Mandaue City Police Office nilampos sab sa pagsikop sa tulo ka pusher nga taga Tinago, Dakbayan sa Sugbo atol sa buy-bust operation sa Barangay Banilad, Dakbayan sa Mandaue.
Ang nadakpan nila ni Police Lieutenant Troy John Lalamunan nga maoy hepe sa Presinto 4 sa MCPO giila nga sila si Ronelio Luzon, 29, Rember Ybañez, 45, ug Eduardo Rizarre, kinsa nakuha og mokabat sa P34,000 nga kantidad sa shabu.
Laing nadakpan mao si Jeffrey Valiente Apa, 44, taga Barangay Mactan, Dakbayan sa Lapu-Lapu, kinsa nakuhaan og 12 ka gagmay nga pakete sa shabu ug P1,000 nga buy-bust money.
Samtang usa sab ka 26-anyos nga HVT city level watchlist ang nasikop sa mga sakop sa Waterfront Police Station atol sa buy-bust operation niadtong Huwebes sa hapon sa may Sitio Laurente, Tejero, Dakbayan sa Sugbo.
Ang nasikop naila nga si Lester Reynes alyas Walwal, walay trabaho ug residente sa maong lugar, kinsa nasakmitan og drugas nga balor og P170 mil. /GMR (BANATNEWS)
- Latest
