Mga pinaugang seahorse nga nasakmit gipangsunog

CEBU, Philippines – Gipangsunog isip proper disposal kaghapon sa buntag ang 59 ka kilong pinauga nga seahorse nga nasakmit sa Bureau of Fisheries and Aquatic Resources (BFAR)-7.

Ang maong mga pinaugang seahorse nasakmit kini sa niaging tuig diin adunay mga giabandodar niini ug ang uban nakuha gikan sa duha ka Chinese nationals diha sa Mactan International Airport human kini nakita sa x-ray machine sa Office for Transportation Security (OTS). Gibana-bana nga mobalor sa P1.7 milyones ang maong mga pinaugang seahorse diin base sa report nga nadawat sa BFAR-7 ang maong seahorse ibaligya kini og P30,000 matag kilo.

Si Alfeo Piloton, direktor sa BFAR-7 nagkanayon nga ang tinubdan sa maong mga Chinese national sa seahorse gikan sa rehiyon-7 ug possible nga aduna sila’y contact sa Sugbo.

Ubos sa Akta Republika 9147 kun “An Act Providing for the Conservation and Protection of Wildlife Resources and their Habitats” gidili ang pagkuha sa maong matang sa marine animals hilabina nga naapil kini sa lista isip endangered species sa Convention of International Trade of Endangered Species(CITES).

Ang nahisgutang duha ka Chinese national gipasakaan na sa BFAR og kasong administratiba sa nahimo nilang kalapasan.

Nagtuo si Piloton nga organized nga grupo ang naghimo niini tungod kay kon aduna sila’y madakpan pulos mga edaran.

Matud ni Piloton nga wala kini nagpasabot nga tungod kay sila edaran na dili nila ipahamtang ang balaod. “Pero we still have to find out kong tinuod ba gyud P30,000 per kilo, kong P30,000 per kilo dinhi sa Pilipinas so mas mahal ni didto gawas sa nasud kay ang seahorse man gud labi na mga Chinese duna ni sila’y bug-at nga nutritional value, pagkaon konsumo nila, morag medicinal para nila”, matud ni Piloton. /BDB (BANAT NEWS)