45 ka sakyanan palibot sa Basilica gi-clamp

CEBU, Philippines – Niabot sa 45 ka sakyanan ang na-clamp sa mga tinugyanan sa Cebu City Transportation Office gumikan sa pataka lang og parking sa wala gitugot nga lugar.

Matud ni John Paul Amores, public information officer sa Communications and Electronics Division sa CCTO, nga ang mga kasagaran nadakpan gikan sa probinsiya nga magpadala sa mga dispatser nga adto mo-park sa wala gidesignar nga parking area.

Sumala pa ni Amores nga ang mga na-clamp nga sakyanan kadaghanan anaa sa radius sa Basilica Minore del Santo Niño ug mga silingan nga kadalanan sama sa may Legazpi hinungdan nga ilang giawhag ang mga nanag-iya sa sakyanan nga ipahimutang kini sa mga gidesignar nga parking area. Ang 45 ka na-clamp nga sakyanan sa unang adlaw sa Misa Novena sa Balaan nga Bata nga si Senyor Santo Niño kasagaran nakalapas sa parking sa sidewalk, parking sa eskina ug parking sa no stopping anytime.

Gitug-an ni Amores nga ang mga na-clamp nga sakyanan makamulta og P1,500 ug mapun-an kini kung aduna siyay mga pending nga violations nga wala lang nila hatagi og pagtagad.

Aron kalikayan nga makamulta ug ma-clamp ang sakyanan giawhag ang mga nanag-iya og sakyanan nga sundon lang gyud ang mga gilatid nga balaud ug magpangutana kung mahimo ba nga parkingan ang lugar o dili.

Awhag usab ni Amores nga kung mahimo ibilin lang sa mga nanag-iya og sakyanan ang ilang sakyanan sa mall aron dili kini makadugang sa kahuot sa trapiko kay mas hamugaway man kung magsakay og pasaheroan kay sa mangita pa sila og parkingan nga duol sa Basilica nga moresulta na hinoon sa clamping.

Gipahibawo usab ni Amores nga sugod karong adlawa ang kilid nga bahin sa Cebu Metropolitan Cathedral dapit sa YLAC giilisan na ang signage nga “No Parking” ngadto sa “No Stopping Anytime” kay gihimo kini nilang diversion road aron moluag-luag ang trapik sa maong dapit.

Samtang niabot sa 12 ka traysikad ang gipangkarga sa sakyanan sa City of Talisay-Traffic Operation Development Authority human wala nituman sa sabot.

Nahitabo kini niadtong niaging adlaw duol sa merkado sa Tabunok, Dakbayan sa Talisay.

Si Jonathan Tumulak, traffic czar sa siyudad, nitataw nga nagsabot na sila kaniadto sa mga drayber sa traysikad nga dili sila molapas diha sa merkado sa Tabunok.

Apan iyang nabantayan nga nigara na gyud ang mga traysikad driver nga mohatud ug mokarga og pasahero sa maong dapit. Gani ang uban magtama o maglinya pa daplin sa karsada nga magpaabot og pasahero.

Hinoon si Tumulak nitataw nga naa sab gyud mga drayber nga nituman sa ilang sabot hinungdan nga iya sila nga gipasalamatan.

Sigun pa ni Tumulak nga ang ilang gibuhat maoy paghinumdum sa mga drayber nga wala sila magtiaw-tiaw sa ilang trabaho kay tinguha ra man sab nila nga mahapsay ang lugar ug maayo ra ang dagan sa trapiko.

Sukad sa ilang pagdakop sa mga traysikad nga nagpabadlong maayo na ang matag adlaw sa lugar. /GMR (BANAT NEWS)