Mga Talisaynon nga naghatag og garbo pasidunggan

CEBU, Philippines – Mga Talisaynon nga naghatag og garbo sa Dakbayan sa Talisay ang pasidunggan diin mao kini ang magsilbing highlight atol sa kasaulogan sa charter day sa siyudad karong Enero 12, 2020.

Si Mayor Gerald Anthony “Samsam” Gullas Jr. nagkanayon nga ang maong kasaulogan mao ang kasumaran sa pagkahimo nga siyudad sa Talisay ug gitagana usab kini sa mga Talisaynon nga naghatag og garbo sa siyudad.

Lakip na niini ang mga atleta nga nisalmot sa South East Asian Games ug uban pa.

Ang bag-ong nihatag og garbo mao si Monsignor Ruben Labajo kinsa natudlo nga bag-ong Vicar General sa Archdiocese.

Si Monsignor Labajo kinsa lumad nga taga Barangay Poblacion, Dakbayan sa Talisay ang una nang gipasidunggan sa konseho sa siyudad atol sa ilang session niadtong Martes sa buntag.

Si Gullas nagkanayon nga posibleng adunay ipahigayong ground breaking sa pipila ka proyekto sa kagamhanan sa siyudad karong tuiga.

Ang siyudad mangimbitar usab kini og mga lokal nga banda alang sa libre nga concert atol sa charter day. /BDB (BANAT NEWS)