DOH: Dili mahadlok sa viral pneumonia
CEBU, Philippines – Ang Department of Health (DOH)-7 niawhag sa publiko nga dili mahadlok sa viral pneumonia nga sakit nga nikatap sa nasud sa China ilabina ngadto sa Wuhan kini bisan og adunay 12 ka flights ang Sugbo gikan sa maong nasud matag adlaw.
Si Dr. Jaime Bernadas, regional director sa DOH-7 nagkanayon nga niabot na sa 59 ka kaso ang natala sa maong nasud diin 11 niini ang nigrabe ang kondisyon.
Gawas niini, adunay laing 121 ka tawo ang giimbestigar sa health ministry sa China human nasuta nga sila nahimamat niadtong mga pasyente nga nagpositibo sa maong sakit.
Matud ni Bernadas nga gituohan nga gikan sa wild animals ang maong virus tungod kay didto man kini unang natala sa seafood market sa maong probinsiya.
Si Bernadas nangkanayon usab nga dili angay mahadlok ang katawhan tungod kaya ang health authorities lukop kalibutan nigama kini og mga lakang aron dili mokatap ang maogn sakit ug ma-contain lang sa maong lugar.
Ang mga sintomas sa viral pneumonia mao ang hilanat, ubo, sip-on, labad sa ulo ug ang lisod nga pagginhawa.
Awhag ni Bernadas ngadto sa katawhan nga ipabilin ang kahimsog sa panglawas aron dili sila daling matakboyan sa mga sakit.
Kini pinaagi sa pagpalig-on sa ilang immune system, pagkaon og mga sustansiyado nga pagkaon ug kon gikinahanglan moinom og mga food supplement ug vitamin. /BDB (BANAT NEWS)
- Latest
