Mga hotels dili pa fully-booked
CEBU, Philippines – Apektado ang mga nanag-iya og hotels sa Dakbayan sa Sugbo sa AirBnb nga maoy nihakop sa mga bookings sa samtang nagkaduol ang Fiesta Senior.
Kini ang gitug-an ni Alfred Reyes, vice president for operation ug general manager sa Bai Hotel. Matud ni Reyes nga daku nilang hagit karon ang AirBnb tungod kay adto na mamuyo ang mga bisita tungod kay barato ug dili regulated.
Sumala pa ni Reyes nga nagkataas ang pagpangabot sa mga turista apan nahibulong sila kung asa kini padulong kay nagkaubos man ang hotel occupancy diin 30 ngadto sa 40 porsyento sa ilang revenue ang nawala.
Gitug-an ni Reyes nga lima ka tuig na nilang nasugatan ang maong problema sa AirBnb ug malaumon sila nga hatagan kini og pagtagad sa kagamhanan.
Si Reyes nitug-an nga bisan nagpaminus sila sa presyo apan wala gihapon napuno ang ilang bookings.
Ang chief tourism operations officers sa Department of Tourism 7 nga si Gelena Dimpas nitug-an nga duna nay gihimo ang ilang ahensiya kalabot niini.
Samtang andam na ang Mactan-Cebu International Airport sa pag-akomodar sa mga turista nga mangabot alang sa Sinulog 2020.
Nagkanayon si Avigael Ratcliffe, corporate communications officer sa GMR-Megawide Cebu Airport Corporation, nga duna sila’y Oplan Biyaheng Ayos alang sa Sinulog 2020 sugod sa Enero 10 hangtud 24.
Aduna sila’y pahalipay sa mga pasahero diin sa Enero 16 sugaton ang mga balikbayan ug manghatag sila og Sinulog kits hangtud sa petsa 18.
Sulod sa Sinulog kits ang official map sa Sinulog Foundation Inc., sunscreen proteksiyon sa panit, whistle, pagkaon ug bottled water.
“Para while naglakaw-lakaw sila sa kanang street protected sila and then well-nourished pud sila and they know where to go kung asa katong grand parade nga route and on the Friday January 17 we also have a Sinulog competition so naa ni siya para to make it mga tourist nato ba inig abot nila sa airport ma-feel na dayon nila nga it’s Sinulog kay murag naa na sila’y glimpse sa unsay ilahang makita inig Sunday, so it’s a competition among schools sa Cebu,” asoy ni Ratcliffe.
Tinguha sab nila ang hamugaway nga kasinatian sa tanang pasahero nga moabot ug mobiya sa tugpahanan diin nahan-ay na ang security ug safety measures ug gihangyo nila ang mga pasahero nga mokooperar sa tanang security procedures ug uban pa. /GMR (BANAT NEWS)
- Latest
