Nagpailis og senina sa Santo Niño nidagsa
CEBU, Philippines – Usa ka adlaw nalang ang paabuton sa mga deboto sa Balaang Senior Sto. Niño magsugod na ang unang adlaw sa Novena Mass subay sa iyang kapistahan.
Nunot niini, daghang mga deboto na sab ang niadto sa ilang mga suki nga mga manindahay og imahen sa mga Santos sa dalan D. Jakosalem kilid sa Basilica Minore del Sto. Niño.
Kini aron magpaayo ug mag-ilis og senina sa ilang imahen sa Balaang Bata aron nindot tan-awon ug hapsay sa pagsugod na gyud sa nobenaryo sa Enero 9.
Naabtan sa Banat News si Rosa Barro, taga Dakbayan sa Talisay ug 20 ka tuig na sa maong matang nga negosyo nga nag-ilis sa senina sa Senior Sto. Niño, ug matud niya nga daku kini og natabang aron makapahuman og tungha sa iyang mga anak.
“Basta magsugod na og novena daghan na ang magpasenina, mag-ilis sila og senina bago magsugod og novena,” asoy ni Barro.
Samtang si Crystal Nebril, taga Minglanilla ug 20 ka tuig na sab sa maong negosyo, naabtan nga nagpintal sa imahen sa Senior Sto. Niño sa kustomer niini.
Matud niya nga ang bayad sa pagpasenina depende kun single color red nga kapa naa ra sa P700 ang bayad apan kun double moabot sa P1,800 ang bayad.
Makuha ra dayon ang imahen tungod kay paspas ra ang pagtrabaho niini sanglit anad na sila niini. /GMR (BANAT NEWS)
- Latest
