Gwen, Duke nitabang sa namatyan og bata sa Camotes

CEBU, Philippines – Gibisita ni Gobernador Gwendolyn Garcia ang ginikanan sa tulo ka semana nga batang lalaki nga namatay sa pneumonia sa district hospital sa Isla sa Camotes.

Ang bata giila nga si Kai Gavin Yangson nga namatay niadtong Enero 2, 2020.

Ang iyaan niini nga si Ainsley Iyanna Consoles maoy nag-post sa Facebook niadtong Enero 3 diin namasangil nga wala kaayo giatiman sa doktor ang bata.

"..nga wala gani niya hikapa ang bata bisan gehimulsohan lang unta...pagkahuman perma sa referral nigawas dayon sa ER nga duka kaayo og nawong.." tipik sa post ni Consoles niadtong Enero 3, 2020 nga niabot na sa kapin usa ka libo nga reactions sa Facebook sa pagsuwat niining balita.

Si Dr. Christina Giango, hepe sa Provincial Health Office, nagkanayon nga nakasumiter na ang doktor sa district hospital og report kalabot sa insidente ug nihimakak ang doktor nga wala nila tagda ang bata.

"Miangkon man sab ang doktor ba wa niya ma-explain pagtarong unsa gyud ang situation sa bata," matud ni Giango.

Si Garcia nihatag og hinabang pinansyal sa pamilya sa bata gikan sa iyang personal nga bulsa.

Ang umagad ni Garcia nga si Kongresista Vincent Franco "Duke" Frasco sa ikalimang distrito diin sakop ang Isla sa Camotes nihatag usab sa iyang personal nga tabang.

Mapasalamaton ang pamilyang Concoles sa gihatag sa mga opisyal.

Si Garcia nagkanayon nga iyang ipaimbestigar ang tibuok nga nahitabo.

"I want full scale of investigation. So akong gi-refer sa Committee on Discipline and Investigation (CODI)," matud ni Garcia. /GMR (BANAT NEWS)