Mga seminars sa DepEd gikwestiyon
CEBU, Philippines — Gikwestiyon karon sa mga lokal nga opisyal ang sagunson nga mga seminars ug conferences sa mga pangulo ug mga principal sa mga tunghaan sa Department of Education.
Usa niini si Medellin Vice Mayor Juan Alfonso Lim sa iyang obserbasyon nagkanayon nga ang DepEd halos matag semana adunay seminar ug conferences ang ilang mga principal, school heads ug supervisors.
“Is this normal? Or as they say in government, tilokon ang budget para walay masobra nga mobalik sa panudlanan. Just saying,” matud ni Lim.
Isip chairman sa committee on education sa Sangguniang Bayan sa Medellin, si Lim nagkanayon nga mohimo siya pakisusi niini.
Matud ni Lim nga dunay mga principal nga iyang nahinabi nibutyag sa ilang reklamo kalabot sa mga seminars ug conferences diin dili na hinoon sila makaatiman sa ilang gimbuhaton sa tunghaan.
Mismo si Gob. Gwendolyn Garcia niuyon sa obserbasyon ni Lim. Sugyot ni Lim sa gobernador nga susihon ang maong butang. “Maybe DepEd has so much money spending for seminars and conferences left and right and I don’t know if this has upgraded the quality of education in our schools,” dugang ni Lim.
Matud pa nga kasagaran sa mga conferences, trainings ug seminars himoon sa hinapos sa tuig aron hutdon ang budget nunot sa giingong kahadlok nga minusan ang gahin sa DepEd sunod tuig. (BANATNEWS)
- Latest
