Papel sa mga layko gikalipay ni Palma

CEBU, Philippines — Mga kalihokan sa mga layko pagtabang sa Simbahan gihangop ni Archbishop Jose Palma sa Archdiocese of Cebu tungod kay napagaan nila ang ubang gimbuhaton sa kaparian pagserbisyo sa katawhan.

Sumala pa sa Arsobispo, daghan mga talento ang mga layko nga nindot usab kaayo nilang napaambit diha sa mga simbahan sama sa gihimo sa Commission on the Laity dinhi sa Sugbo.

Ang maong komisyon mao karoy nilahutay pagpadayon sa ilang programa sa Pagsangyaw 2021 alang sa pagpangandam sa dakong kalihukan sa ika- 500 tuig nga Kristiyanismo sa Pilipinas.

Ang Arsobispo nitug-an ang Pagsangyaw 2021 anaa na sa ikaupat nga season. Karong adlawa adlaw nga Domingo sugdan ang pagpaila sa gitawag nga Church of the Poor.

Kagahapon sa buntag ang Arsobispo nakig-uban sa mga sakop sa COL Board ug Pagsangyaw team alang sa usa ka kukabildo ug mga pagpaambitay sa mga kasinatian ug ang pagpakita usab ngadto sa arsobispo sa umaabot nga segment sa Season 4.

Ang maong segment nagpakita sa reyalidad sa kinabuhi ilabi na sa pagkakabus apan wala sila nawagtangan sa kasibot sa pagserbisyo sa simbahan.

"Pagkanindot hunahunaon nga kadaghanan sa mga layko nakakita sa ilang role, we journey together, we need each other and we are co-essential," si Palma nagkanayon.

Ang Chairman sa Commission on the Laity Fe Mantuhac-Barino miingon nga namatikdan sab niya ang talagsaong gana sa paglihok ug kadasig sa mga layko sa mga kalihokan sa simbahan. /IBM (BANATNEWS)