Abogado gipusil, naangol

CEBU, Philippines — Mga kasong gikuptan maoy gitan-aw nga motibo sa pagpusil sa usa ka abogado niadtong Biyernes sa buntag diha sa Ma. Asuncion Village, Brgy. Daro Dakbayan sa Dumaguete sa Negros Oriental.

Matud ni Negros Oriental Provincial Police Office (NORPPO) Director Police Colonel Julian Entoma nga naila sa paghupot sa mga kasong sibil si Atty. Ray Moncada, 74.

Sagad sa kaso nga gikuptan mao ang kaso sa panag-ilogay sa yuta sa iyang mga kliyente.

Gibutyag sa pamilya sa biktima nga nakadawat og sulat ang abogado nga hulga nga patyon ang usa sa miyembro sa pamilya niini.

Niadtong Biyernes sa buntag adunay usa ka motorsiklo nga adunay sakay nga duha ka mga lalaki ang nag doorbell sa gate sa ilang balay.

Ang biktima maoy niabli niini apan pagkakita niyang pulos nagsuot og helmet dali niyang gisirad-an ang ganghaan apan gipaulanan kini og bala. Nakaangkon og samad pinusilan sa abaga nga nilahos sa tiyan ang abogado ug nawagtangan sa panimuot ug dali nga gidala sa tambalanan ug giingong luwas na ang kahimtang.

Narekober sa crime scene ang lima ka basiyo sa gituohang bala sa kalibre 45 nga pistola. Ang kapolisan padayon pa sa ilang imbestigasyon. /IBM (BANATNEWS)