Ginatilan gikiha, pakyas sa road clearing

CEBU, Philippines — Apil ang Lungsod sa Ginatilan sa Lalawigan sa Sugbo sa 10 ka lugar sa nasud nga ikiha sa Department of Interior and Local Government sa kapakyas sa pagtuman sa paglimpyo sa kadalanan nga gimando ni Presidente Rodrigo Duterte.

Matud ni DILG Undersecretary Epimaco Densing III nga kasong grave misconduct ug gross negligence ang ilang gipasaka batok sa mga hingtungdang mayor sa buhatan sa Ombudsman niadtong Disyembre 16.

Ang 10 nga gikiha mao ang mga mayor sa Guinsilban, Camiguin; Pili, Camarines; Sur; Ginatilan, Cebu; Sagay, Camiguin; Manticao, Misamis Oriental; Pagsanjan, Samar; Caraga, Davao Oriental; Aurora, Zamboanga Del Sur; Baco, Oriental Mindoro; and Lapuyan, Zamboanga del Sur.

Giingong sa 1,534 ka siyudad ug lungsod lukop nasud, 101 niini ang pakyas sa gihimong assessment diin 15 ang nakakuha og labign ubos nga grado.

“Yung lima hindi pa tapos yung documentation. Inuna na namin. Bago mag-Pasko, merong na tayong na-file-an na sampung munisipyo. As promised, those who did not follow the Presidential directive on road clearing returning the public roads and public sidewalks to public use, yan kasohan na namin,” matud ni Densing.

Ang duly accomplished and signed validation report giduso niadtong Oktubre 5 sa buhatan ni Secretary Año pinaagi sa Bureau of Local Government Supervision.

Base sa DILG Memorandum Circular-121-2019, ang mga local government units kinahanglan mopatuman og ordinansa bahin sa road clearing ug pagdili sa mga illegal construction ug uban pa aron limpyo ang kadalanan nga maagian sa mga tawo ug mga sakyanan.

“Sinabi nating pag hindi kayo nagtrabaho, hindi kayo sumunod sa direktiba ng Pangulo, ni Secretary Año, then kakasohan po namin kayo,” matud ni Densing.

Matud ni DILG-7 Director Leocadio Trovela nga sa Central Visayas, 91 porsyento sa mga LGUs ang nakatuman sa kamanduan lakip ang mga highly urbanized cities sa Cebu, Lapu-Lapu ug Mandaue.

Hinoon dunay 12 sa 113 ka siyudad ug lungsod sa Central Visayas ang pakyas sa compliance rate base sa final review sa resulta sa validaton. (BANATNEWS)