Sinulog Festival mabatyagan na
CEBU, Philippines — Niining unang semana sa Enero mabati na ang “Sinulog fever” gumikan sa buntings nga gipamutang ingon man ang mga contingents sa Sinulog nagsugod na sa pagbansay-bansay aron mosalmot sa prestihiyusong kalihukan.
Ang Sinulog Festival usa sa gikahinaman dili lang sa mga Sugbuanon apan ingon man sa mga lokal ug langyaw nga mga turista.
Gawas sa buntings nga gipamutang sa nagkadaiyang dalan sa Siyudad sa Sugbo, ang mga mosalmot sab sa Sinulog sa Kabataan sa Dakbayan ug Lalawigan subsob na ang pagpangandam.
Sama sa contingent sa Dakbayan sa Carcar nga naabtan sa Banat News sa Cebu City Sports Center nga nag-blocking sa stage nga hapit na sab mahuman sa pagbuhat.
Matud sa ilang choreographer nga si Rolando Monto Jr., nga niining pagsalmot nila sa Sinulog 2020 usa sa ilang giandam ang stamina sa ilang usa ka gatus ka dancers nga makalahutay sa taas kaayo nga preparasyon nga ilang gihimo ingon man ang budget niini.
Sa niaging Sinulog 2019, ang Dakbayan sa Carcar maoy champion sa Sinulog Base Category ug giangkon niini nga nibati sila og pressure kay gawas nga daghang bag-o nga mangapil nga mga maayo sab, kinahanglan nila depensahan ang pasidungog.
“Making bag-o karon sa mga manan-away dili lang moestorya kay ganahan ko ilaha lang atngan ang maong presentation sa Carcar. Maka-expect gyud sila nga mas among tupngan among performance last year sa karon nga Sinulog,” matud ni Monto.
Gibutyag niini nga usa sa mga hagit nga ilang nasugatan ang panahon tungod kay sa mga niaging semana dunay bagyo, mouwan ug magkasakit ang ilang mga dancers.
Nasayran nga gawas sa mga dancers, duna sab sila’y 500 ngadto na sa 600 ka propsmen. /GMR (BANATNEWS)
- Latest