TCPS nakakuha og hulagway sa gunmen pag-ambush sa doctor
CEBU, Philippines — Nakakuha na og mas klarong hulagway sa dagway sa mga nagpatay sa veterinarian ang kapulisan sa Dakbayan sa Talisay sumala pa sa ilang hepe nga si Police Major Gerard Ace Pelare.
Asoy pa niya nga usa ngadto sa duha ka suspek ang ilang gisundan karong panahona apan dili lang una siya makabutyag sa mga pangalan o hatag og dugang detalye.
Nagtuo si Pelare nga husto ang direksyong gisubay sa ilang imbestigasyon ilabi na nga aduna silay nakuhang footage sa CCTV nga makatabang sa kaso.
“It could give us the hint on the faces sa mga suspects pero out of town pa ang tag-iya sa balay nga naa ang CCTV,” nagkanayon si Pelare.
Si Dr. Neil Boligao nga taga Barangay Cansojong gipusil sa nagmotorsiklong mga lalaki diha sa Sitio Maanyag, Barangay Biasong niadtong Lunes sa kaadlawon.
Gikan sa ihawan ang doktor samtang padung na unta nga mupauli sakay sa iyang puti nga pick-up.
Bangi sa negosyo sa biktima sa karne ingon man sa iyang kasosyo ang ilang gitutokang posibleng motibo sa maong ambush. /IBM (BANATNEWS)
- Latest