14 kawani sa Cebu City Hall positibo sa drug test

CEBU, Philippines — Dugang 14 ka mga kawani sa Cebu City Hall ug usa sa Department of Health ang nagpositibo sa gipahigayon nga kinalit nga drug test sa mga tinugyanan sa Cebu City Office on Substance Abuse Prevention kun COSAP nga gipangulohan sa pangulo Jonah John Rodriguez.

Ang mga nagpositibo sa drug test diha sa City Health Department niadtong Disyembre 26 , upat gikan sa NDP sa DOH diin ang usa nadestino sa siyudad,  upat gikan sa Cebu City Transportation Office, usa sa Department of Public Services, usa sa Department of Engineering and Public Works ug usa gikan sa Department of Social Welfare and Services atol sa orientation sa mga bag-ong na hire nga kawani,  duha sa Accounting Department diin usa niini ang permanent employee ug  usa sab gikan sa Mayor’s office nga nakadestino sa MICS.

Matud pa ni Rodriguez sa kinatibuk-an niabot na og  71 ka mga kawani ug bag-ong nadawat nga empleyado sa city hall ang positibo sa kinalit nga drug test.

Gitug-an ni Rodriguez, tanan mga nagpositibo ilaha kining iduso ngadto sa City Legal Office, alang sa ipahigayon nga imbestigasyon ug magpaabot usab sila sa resulta sa confirmatory test.

Makanunayon ang awhag ni Rodriguez sa tanang mga trabahante nga likayan gayud nga malambigit sa paggamit sa illegal nga drugas kay wala gayud kini kaayohan nga ihatag kay sa kadugayan masakpan ra gihapon sila. /IBM (BANATNEWS)