Mga nagbakasyon wala pa mobalik sa Sugbo

CEBU, Philippines — Nasinati  sa ikaduhang adlaw sa bag-ong tuig ang ka loag sa mga dalan  sa Dakbayan  sa Mandaue paingon sa Lungsod  sa Consolacion ug Dakbayan  sa Lapu-Lapu.  

Ang nabantayan usab nga dili kaayo daghan ang mga nagdagan nga pribadong sakyanan ug gituohan nga wala pa mobalik sa Sugbo gikan sa ilang bakasyon ang mga trabahante.

Ang maong mga lugar sa regular nga mga adlaw kanunay nga maghuot ang dagan sa trapiko.

Nunot niini, ang kapolisan  sa  Lungsod  sa Consolacion  sa pagsugat  sa tungang gabii  sa bag-ong tuig walay natala nga mga panghitabo sama sa nabiktima sa pabuto ug krimen.

Samtang sa Dakbayan sa Mandaue adunay natala nga nagpabuto og armas ug adunay usa ka tawo ang naangol.

Si Police Colonel  Jonathan  Abella, direktor sa MCPO nihulagway nga sa kinatibuk-an malinawon  ug hapsay  ang pagsugat  sa tungang gabii sa bag-ong tuig.

Ang direktor sa Lapu-Lapu City Police Office (LLCPO) Police Colonel Clarito Baja sama kang Abella nagkanayon nga walay nahitabong dagko nga insidente sa ilang lugar sa pagsugat sa bag-ong tuig.

Apan ang kabomberohan  sa Dakbayan  sa Lapu-Lapu  sayo sa pagsugat sa tungang gabii sa bag-ong tuig ang nakatubag og alarma sa nasunog nga staff house sa Barangay Buaya diin nikabat ngadto P120,000 ang danyos. /BDB (BANATNEWS)