P1.5 milyones nga balor sa pabuto giguba

CEBU, Philippines — Moabot sa P1.5 milyones ang balor sa nasakmit nga illegal firecrackers ang giguba kagahapon sa kapolisan sa Police Regional Office 7.

Gihingusgan gyud sa kapolisan ang kampanya batok sa illegal firecrackers hinungdan nga daghan ang nasakmit gikan sa Cebu City Police Office, Lapu-Lapu City Police Office, Mandaue City Police Office, Bohol Provincial Police Office ug Negros Oriental Police Office.

Kini gilangkuban sa mga piccolo, super lolo, lolo thunder, big triangulo, mother rockets, boga, Judas belt, big bawang, ug uban pa nga posibleng legal nga mga pabuto apan ang namaligya wala’y lisensiya o permit.

“All in all there about 252,928 na mga illegal firecrackers items na na-confiscate by our police troops representing by our different provincial office and cities here in Central Visayas. Nangunguna po campaign ang Cebu City Police Office with a total og 222,354 and the amount of which is P1,239,544; ang sumusunod po ay ang Cebu Provincial Police Office 117,129 followed by Lapu-Lapu City P95,185 worth of confiscated items and then ang Bohol Provincial Police Office P52,025 and then finally yung Negros Oriental with P35,145,” matud ni PRO-7 Deputy Regional Director for Administration, Police Brigadier General Ildibrandi Usana.

Gawas sa pagsakmit sa mga pabuto, mohimo sab og legal nga lakang ang kapolisan batok niadtong mga namaligya niini pinaagi sa pagpasaka og tukmang kaso.

Gawas sa pagbasa sa mga firecrackers, pabuthon sab kini tungod kay kung mauga possible pa gihapon kining mobuto.  Sa Dakbayan sa Lapu-Lapu diin nahimutang ang daghang tindahan ug tighimo og pabuto, nasakmit sa kapolisan ang kapin sa P150,000 nga kantidad sa nagkadaiyang matang sa mga pabuto nga bisan legal apan gibaligya sa dili designated firecrackers area.

Ang giila sa kabomberohan sa dakbayan nga firecracker zone area maong dalan paingon sa Lungsod sa Cordova nga mao ang Barangay Babag ug Canjulo.

Sa nasayran nga gimando ni Police Colonel Clarito Baja, direktor sa LLCPO, ngadto sa iyang mga hepe sa mga presinto nga seguruhon nga walay angol sa pabuto atol sa pagsugat sa Bag-ong Tuig.

Apan ang kapolisan nakatala og duha ka biktima sa pabuto nga naglakip sa 13 ug 5-anyos nga batang lalaki sa Barangay Tingo sa Isla sa Olango.

Sa taho sa kapolisan nga ang 5-anyos nga batang lalaki ang namunit sayo sa buntag sa nagpasad nga pabuto sa ilang dapit dihang kalit lang kining nibuto hinugdan sa kadaut sa mata niini. /GMR (BANATNEWS)