Nabuthan sa pabuto ningminus

CEBU, Philippines — Niubos og 24 porsyento ang natala nga kaso sa firecracker-related incidents sa Central Visayas base sa datos sa Regional Epidemiology and Surveillance Unit sa Department of Health 7.

Ang maong kaso natala gikan sa petsa 21 sa Disyembre 2019 hangtud sa Enero 1, 2020.

Naa lang sa 38 ang kaso sa firecracker-related incidents itandi sa samang mga adlaw sa Disyembre 21, 2018 hangtud sa Enero 1, 2019 nga niabot og 50 ka kaso.

Sa 38 nga nabuthan, 13 niini ang sila gyud mismo ang nagpabuto samtang ang 25 kadtong mga napagan o naamong lang sa nagpabuto.

Ang mga lugar nga dunay daghang nabuthan mao ang Dakbayan sa Sugbo (12), Mandaue (6), Lapu-Lapu (3), Talisay (3) ug Lungsod sa Minglanilla (2) diin ang labing bata nga nabiktima sa pabuto mao ang usa ka tuig nga bata ug ang 51-anyos ang labing hamtong.

Apan ang hepe sa kapolisan sa Siyudad sa Talisay nitataw nga wala silay natala nga nabuthan sa pabuto atol sa pagsugat sa Bag-ong Tuig.

Si Police Major Gerard Ace Pelare nalipay kay sa kasaysayan mao kini ang unang hitabo nga zero firecracker incident ang Dakbayan sa Talisay.

Sa nasayran nga walay hunong ang pagsuroy sa kapolisan sa nagkalain-laing dapit aron sa pagpahimangno sa katawhan nga likayan ang pagpabuto inay gamiton ang torotot o bisan unsa nga butang nga sa pagsaba-saba sa pagsugat sa Bag-ong Tuig.

Matud ni Pelare nga nakat-on na gyud ang mga Talisaynon kun unsa ang epekto sa pabuto.

Siya nagtuo nga matured na ang katawhan human sa pipila ka panghitabo nga adunay nadisgrasya sa pabuto.

Si Dr. Nelner Omus, Medical Officer IV sa DOH-7, niasoy nga usa sa nakatampo sa pagkunhod sa firecracker-related incidents ang balik-balik nga pahimangno ngadto sa publiko.

“Usa ani ang atong pagbalik-balik nga pahimangno nga mag-careful and at the same time ang awhag nga duna man tay lain nga pamaagi aside from ani nga magpabuto gyud para maka-create ta og noise or para maka-create ta og kasadya sa maong pagsugat ug celebration sa Pasko ug New Year,” matud ni Dr. Omus. /GMR (BANATNEWS)