93-1 tutukan karong tuiga sa Capitol, CH

CEBU, Philippines — Ang kadagkuan sa Cebu City Hall ug Capitol gikatakda nga magtigum og balik sayong bahin niining tuiga aron hisgutan ang reappraisal ug direksyon sa bag-ong Memorandum of Agreement (MOA) ug uban pa kalabot sa isyu sa 93-1.

Unang gipahibawo ni Gob. Gwendolyn Garcia nga wala nay land swap deal nga mahitabo tali sa Probinsiya sa Sugbo ug Dakbayan sa Sugbo kalabot sa 93-1 lot.

Gibutyag ni Garcia nga nasabotan niya ug sa mga opisyal sa Dakbayan sa Sugbo nga “i-mutually terminate” ang gisudlan nga MOA sa panaHon ni kanhi Mayor Tomas Osmena ug kanhi gobernador ug karon Bise Gob. Hilario Davide III diin ang duha ka opisyal nagpinirmahany kini sa Deed of Donation and Acceptance sa pipila ka luna nga sakop sa 93-1 niadtong Agosto 2018.

Ang unang kasabotan giingon makabenepisyo ang gibanabana nga 5,000 ka residente sa 11 ka barangay sa Dakbaya sa Sugbo.

Sa maong kasabotan ang probinsiya mohatag sa 32 ka ektarya nga luna nga anaa sa nagkadaiyang barangay sa dakbayan diin adunay nagpuyo nga urban poor settlers.

Ihatag usab niini ang 1.5 ektarya nga luna sa Department of Agriculture Compound sa M. Velez St.; 2,358 square meters sa Gorordo Ave. sa Barangay Lahug; ug 577 square meters sa Don Gil Garcia St. sa Barangay Capitol Site.

Bugti niini, ang luna nga gipanag-iya sa Dakbayan sa Sugbo sama sa 2.5 ka ektaraya sa South Road Properties (SRP), 3.3 ka ektarya sa luyo sa SM City Cebu sa Barangay Mabolo; 2.5 ka ektarya nga botanical garden sa luyo sa SM Seaside City sa SRP; siyam ka ektarya nga luna sa Pulpogan, Consolacion; 1.37 ka ektarya nga luna sa septage treatment plant ug 2,476 metro kwadrado nga luna sa City Abattoir ihatag ngadto sa Kapitolyo.

Apan si Garcia nagkanayon nga ang mga nahisgutang luna ubos sa “swap deal” mobalik sa tagsa-tagsa nga pagpanag-iya sa Kapitolyo ug Cebu City Hall.

Si Garcia nagkanayon nga motutok sila sa pagpahigayon og reappraisal sa mga luna isip apil sa lakang nga ilang himoon alang sa pagsulod og laing MOA tali sa Kapitolyo ug Dakbayan sa Sugbo. /GMR (BANATNEWS)