ASF hugot nga gibantayan sa sugbo

CEBU, Philippines — Dili mominus unom ka executive orders ang giluwatan ni Gob. Gwendolyn Garcia sa tuig 2019 alang sa pagpanalipod sa swine industry sa Lalawigan sa Sugbo batok sa African Swine Fever (ASF).

Ang African Swine Fever (ASF) usa ka sakit o virus sa baboy nga grabe makatakod. Ang maong sakit nikatap na sa pipila ka probinsiya sa Luzon sama sa Rizal ug Bulacan hinungdan nga ang Probinsiya sa Sugbo nipatuman og hugot nga seguridad sa pagpasulod og produkto sa baboy.

Unang niluwat og EO 13 ang gobernador sa pag-umol sa Cebu Provincial Anti-African Swine Fever Task Force.

Ang task force gilangkuban sa Veterinary Office sa Kapitolyo, Department of Agriculture, Central Visayas Pork Producers Cooperative, Philippine National Police, Food and Drug Administration, Department of Interior and Local Government ug uban pang ahensya.

Tahas niini ang pag-monitor sa tanang entry points sa lalawigan nga posibleng masudlan sama sa pantalan ug airport og mga produkto sa baboy ilabi na ang gikan sa Luzon ug sa dili mominus 20 ka nasud nga apektado sa ASF sama sa China ug Europe, Hong Kong, North Korea ug uban pa.

Laing EO ang giluwatan ni Garcia alang sa pag-ban sa pagpasulod og baboy, pork-related products, by-products gikan sa raw meat hangtud sa processed o niluto nga karne sa baboy ngadto sa frozen boar semen sulod sa 100 ka gatos ka adlaw gikan sa Luzon ug mga nasud nga apektado sa ASF.

Apan sa ubang probinsiya sa Visayas ug Mindanao, kinahanglan makapakita og mga dokumento o clearance sama sa Meat Inspection Certificate gikan sa National Meat Inspection Service ug Veterinary Shipping Permit alang sa mga locally-produced products.

Alang sa imported nga mga produkto kinahanglan adunay Certificate of Meat Inspection gikan sa NMIS ug VSP. Sa mga processed pork ug pork products kinahanglang adunay License to Operate (LTO) ug Certificate of Products Registration sa FDA.

Sa pagbiyahe sa mga live hogs kinahanglan adunay Veterinary Health Certificate ug VSP gikan sa point of origin niini; Livestock Handler’s Permit gikan sa DA; Livestock and Poultry Transport/ Carrier Registration gikan sa DA-Bureau of Animal Industry; Certificate of Vehicle Registration gikan sa DA; Disinfection Clearance; ug Farm Registration gikan sa DA-BAI.

Niadtong Nobiyembre gilugwayan sa gobernador ang pag-ban sa pagpasulod sa tanang matang sa karne sa baboy gikan sa Luzon  ug ASF-affected countries ngadto na sa Hunyo 2020.

Gani laing EO ang giluwatan ni Garcia diin apil sa dili mapasulod sa probinsiya ang mga karne sa manok, baka, isda o ubang klase sa karne nga masagol sa karne sa baboy.

Ang hugot nga seguridad pinaagi sa kamanduan sa gobernador batok sa ASF sa Probinsiya sa Sugbo nakaapekto kini sa pipila ka kompaniya nga mopasulod og baboy o karne sa baboy sa probinsiya.

Gani bisan og niawhag na ang DILG nga libkason ang ban sa mga pork products gikan sa Luzon, si Garcia wala motuman niini ug nagkanayon nga dili siya mokompiyansa tungod kay risgo niini ang P11 bilyones nga swine industry sa Sugbo.

Bag-ong EO nga giluwatan sa goberandor giapil na usab pag-ban ang mga karne sa baboy gikan sa Rehiyon 8 human nasayran nga gilibkas sa pipila ka probinsiya ang ban niini sa pagsulod sa pork products gikan sa Luzon.

Tungod sa pag-ban sa mga pork products gikan sa Luzon ug mga nasud nga apektado sa ASF, dili moubos sa usa ka milyon na nga kantidad sa mga produkto sa baboy ang nasakmit sa task force sama sa longganisa, tocino, hotdogs ug uban pa.

Nakuha kini gikan sa mga tindahan, department stores ug pantalan. Ang uban gibalik sa orihinal nga gigikanan gumikan kay kuwang og dokumento nga napakita. /GMR (BANATNEWS)