CCPO top 1 sa operasyon batok drugas

CEBU, Philippines — Upat ka tuig na ang kampaniya batok sa ginadiling drugas sa adminstrasyon ni Presidente Rodrigo Roa Duterte.

Si Duterte nihagit kini sa Police Regional Office (PRO)- 7 ug Philippine Drugs Enforcement Agency (PDEA)- 7 tungod kay giingong kasagaran sa mga drug personalities   nga nalakip sa iyahang listahan anaa sa Central Visayas.

Sa pagtak-op sa tuig 2019 sukad nilingkod ang bag-ong gitudlo nga hepe sa PRO-7  Police Brigadier General Valeriano De Leon niadtong buwan sa Oktubre dul-an  sa P200 milyones nga balor sa shabu ang nasakmit sulod sa duha ka bulan sa tibuok Central Visayas.

Matud ni De Leon nga usa sa iyang tinguha sa iyang paglingkod isip direktor sa Central Visayas mao ang pagtuman sa tinguha ni Duterte nga pagpakunhod sa drugas ilabi na sa Sugbo.

Base sa talaan sa PRO-7 nikabat ngadto sa 1,353 ka operasyon ang napahigayon sa kapolisan sa paglingkod ni De Leon sa pwesto diin ang Cebu City Police Office (CCPO) maoy nag-una nga nakasakmit og ginadiling drugs nga nikabat tanan sa P120 milyones.

Ang maong mga operasyon ubos sa pagpangulo sa kanhi mga hepe sa CCPO Police Colonel Gemma Vinluan ug Police Colonel Geovanie Maines.  Nunot niini, ang San Nicolas Police Station sa CCPO pinangulohan ni Police Major Keneth Paul Albotra nakadawat og pasidungog isip best police station tungod kay sila ang nag-una sa mga police station nga adunay labing daghan nga nasakmit nga ilegal nga drugas ug nasikop usab nila ang duha ka high value target (HVT) sa Barangay Ermita nga sila Ludevico Abadiez ug Jesse Chris Inoc Tura sa Barangay Pasil.

Gisundan sa Negros Oriental Provincial Police Office (NORPPO) diin nibalor ngadto P25 milyones nga kantidad sa drugas ang ilang nasakmit.

Usa sa mga operasyon sa NORPPO mao ang pagkasakmit sa P6.5 milyones nga shabu niadtong Disyembre 22, 2019 sa Lungsod sa Sibulan diin ang operasyon gipangulohan ni Police Lieutenant Colonel Wilfredo Alarcon, hepe sa Dumaguete Police Station uban sa NORPPO Provincial Intelligence Branch (NORPPO-PIB).

Sa maong operasyon nasikop ang suspetsado nga si Ryan Fontejon kinsa giingong regional high value target ug nasakmitan kini og pinaketeng shabu.

Samtang ang Cebu Provincial Police Office (CPPO) ubos sa pagdumala ni Police Colonel Rhoderick Mariano nikabat ngadto sa P16 milyones nga balor sa shabu ang nasakmit sa tibuok Probinsiya sa Sugbo.

Ang CPPO maoy nag-una nga adunay labing daghan nga nalarot nga marijuana nga nibalor ngadto sa P35 milyones.

Ang maong mga marijuana nakuha gikan sa Dakbayan sa Toledo, Lungsod sa Balamban ug mga silingan nga lungsod.

Sa Mandaue City Police Office (MCPO) nikabat ngadto sa P12 milyones ang balor sa drugas ang ilang nasakmit.

Ang Lapu-Lapu City Police Office (LLCPO) nikabat ngadto sa P5 milyones nga balor sa shabu ang nasakmit sa Dakabayan sa Lapu-Lapu ug ang Siquijor Provincial Police Office (SPPO) maoy adunay labing gamay nga nasakmit nga ilegal nga drugas.

Sa kinatubuk-an usab nikabat ngadto sa 1,439 ka drug personalities ang nasikop ug lima niini kinsa giingong nisukol sa mga polis atol sa operasyon ang napatay. /BDB (BANATNEWS)