Seguridad sa Sinulog 2020 mas gipahugtan

CEBU, Philippines — Andam na ang Cebu City Police Office (CCPO) sa pagpatuman sa seguridad sa umaabot nga Sinulog 2020.

Kini maoy gibutyag ni CCPO Director Police Colonel Engelbert Soriano kinsa bag-ohay pang milingkod sa maong buhatan niadtong Disyembre 27 sa miaging tuig.

Matud pang Soriano anaa na sa final phase sa pagpangdandam sa seguridad sa Task Force Sinulog 2020.

Gipasalig usab ni Soriano nga dili makaapekto sa pagpangandam sa kapolisan ang paglingkod niya isip bag-o nga City Director sa CCPO.

Kini tungod kay siya usab ang hepe sa Regional Operations Division sa Police Regional Office 7 nga usa usab nga nalambigit sa pagpangdam sa seguridad.

Gibutyag sab ni Soriano nga ang mga technical equipment nalang ilang gipaabot nga maabot sama sa pag install sa mga closed circuit television (CCTV) cameras nga ipamutang sa mga dalan sa dakbayan.

Nagunang butangan niini mao ang Sinulog Grand Parade route, ug Solemn Procession route ingon man sa mga dapit nga adunay mga opisyal nga kalihokan ang Simbahan ug Sinulog Foundation.

Giduso na usab sa kapolisan ang hangyo nga suspension sa signal mga cellular phones sa adlaw sa Sinulog didto sa National Telecommunication (NTC).

Samtang mokabat ngadto sa kapin dos mil ka mga polis ang ipakatap sa kadalanan sa atol sa Sinulog 2020 wa pay labot niini ang pwersa gikan sa Central Command sa Armed Forces of the Philippines nga motabang sa pagbantay.

Gibutyag ni Police Lieutenant Colonel Allan Madrid Rosario hepe sa Operations Branch sa CCPO mas gipahugtan ang security template nga ilang giandam para ning tuiga kun itandi sa nakalabay nga Sinulog 2019 tungod sa nakita nilang kinahanglang palambuon.

Apil na niini ang pagdili sa pagpasulod sa diha sa Basilica Minore del Sto. Niño sa mga tawong magdala og backpacks, nagsul-ob og jacket, kalo, pagdala sa hait nga hinagiban ug uban pa.

Subay usab niini giawhag ni Rosario ang publiko nga atol sa Solemn Procession nga kutob sa mahimo dili nalang gyud magdala og mga gagmay nga bata tungod kay gipaabot nga magdasok gyud ang mga tawo. (BANATNEWS)