Namaligya og paboto nabulabog sa mga bata
CEBU, Philippines — Mga menor de edad maoy nagsilbing tigsumbong sa mga nagkawat-kawat nga namaligya og paboto sa Dakbayan sa Talisay niadtong Lunes sa hapon. Sila sab ang hinungdan nganong daghan ang nasakmit nga paboto ang kapolisan sa siyudad.
Gisugdan ang saturation drive mga alas 4 pasado sa hapon hangtud natapos mga alas 5:30 sa hapon.
Nasakmit sa mga awtoridad ang 376 ka putos sa sparklers; 660 kabuok nga sky rocket (kwetes); 24 kabuok bawang; 153 ka putos sa whistle bomb; 137 ka putos sa pop pop; 507 ka karton sa piccolo; upat ka putos sa Judas belt ug duha ka karton sa palipao crackers.
Si Police Major Gerard Ace Pelare, hepe sa Talisay City Police Station, nibutyag nga gipasidan-an na gyud daan ang tanan nga dili mohimo og ilegal nga pagbaligya apan padayon gihapon nga nisupak.
Hinoon sa tanan nga operasyon sa kapolisan walay bisan usa nga niangkon nga ila ang maong mga paboto.
Tulo lang ka tindahan ang nikuha og permit sa pagbaligya og mga paboto sa Dakbayan sa Talisay nga naa sa parkingan sa duha ka malls. /GMR (BANATNEWS)
- Latest
