Upat ka tawo ang nibanhig sa doctor
CEBU, Philippines — Upat ka tawo ang gitutokan sa kapulisan sa Dakbayan sa Talisay nga maoy nagpatay sa usa ka veterinarian didto sa Sitio Maanyag, Barangay Biasong, Dakbayan sa Talisay niadtong Lunes sa kaadlawon. Si Police Major Gerard Ace Pelare, pangu sa Talisay City Police Station nibutyag nga away sa negosyo ang anggulo nga ilang gitan-aw.
Ang biktima nga si Dr. Neil Boligao nagtrabaho isip ka veterinarian samtang naa sab negosyo nga karne sa kamerkadohan. Gikaingon nga adunay kasusyo ang biktima sa iyang negosyo apan nagkadeperensya kini.
Si Pelare nitataw nga adunay CCTV camera nga nakakuha sa maong panghitabo apan dili lang maklaro ang dagway sa mga nagbira sa biktima.
Gikan sa ihawan sa Talisay ang biktima apan sa iyang pagbiya diha na kini gipauwanan og mga bala samtang luwan sa iyang pickup nga sakyanan.
Sigon pa ni Pelare nga gawas sa duha ka lalaki nga nibira sa biktima aduna sab lain nga motorsiklo nga maoy nagsilbing back up.
Hinuon nipasabot si Pelare nga ila pa nga gihinay-hinay sa pagkolekta ang mga ebidensya aron mapalig-on ang kaso nga ipasaka unya sa mga mamumuno. /IBM (BANATNEWS)
- Latest