Negosyante veterinarian gipatay

CEBU, Philippines —  Patay ang usa ka veterinarian dihang kini gipauwanan og bala sa duha ka wa ilhing lalaki nga nagsakay og motorsiklo diha sa Sitio Maanyag, Barangay Biasong, Dakbayan sa Talisay kagahapon sa alas 2 sa kaadlawon.

Ang biktima mao si Neil Boligao nagpuyo sa nahisgutang siyudad.

Si Patrolman Eleazar Belciña sa Talisay City Police Station nibutyag nga alas 8 pa sa gabii nakit-an nga nisulod sa ihawan og mananap si Boligao.

Sa dihang nigawas na kini sa ihawan sakay sa iyang puti nga pick-up kalit lang kini nga gipauwanan og bala sa duha ka wala mailhing mga lalaki nga nagsakay sa puti ug itom nga DT nga motorsiklo.

Nagkanayon si Belciña nga nisibat ang mga mamumuno samtang nataud-taoran pa nga nasusi ang kahimtang sa biktima gumikan kay ang mga tawo nahadlok pagduol sa sakyanan niini. Ang mga nirespondeng polis nakakuha og tulo ka basiyo sa bala sa ug usa ka bala nga wala makabuto diha sa crime scene. Samdan sa iyang kalawasan ang biktima hinungdan sa iyang kamatayon.

Si Belciña nitataw nga base sa inisyal nga impormasyon nga ilang nakuha regular nga magpaihaw sa maong ihawan ang biktima gumikan kay nagnegosyo kini og karneng baboy. Gawas sa iyang negusyo nagpraktis sab kini sa iyang pagka veterinarian nga pribado.  Apan ang kapulisan nitutok sa anggulo nga may labot sa iyang negusyo ang motibo sa pagpatay kaniya.

Matud pa nga dunay mga alegasyon ning bag-ohay lang aduna kini gipotbol sa trabaho ug duna sab kini wala pagkasinabtanay sa kasosyo sa negusyo.  IBM (BANATNEWS)